Salvasqanmanta Tayta Diosman gracias qosqan
118
Allin kasqanraykuyá
Tayta Diosman graciasta qoychik.
Wiñaypaq kuyapayakuq kasqanraykuyá
Tayta Diosman graciasta qoychik.
2 Israel castakuna,
Payqa wiñaypaq kuyapayakuqmi,
nispayá niychik.
3 Aaron castakuna,
Payqa wiñaypaq kuyapayakuqmi,
nispayá niychik.
4 Tayta Dios respetaqkuna,
Payqa wiñaypaq kuyapayakuqmi,
nispayá niychik.
5 Llakisqa kaspaymi
qayakurqani Tayta Diosta.
Contestawaspanmi horqoykuwarqa
kichki sitiomanta.
6 Tayta Diosmi yanapawaqniyqa,
manam manchakusaqchu.
Runapa imapas rurawanantaqa
manam manchakusaqchu.
7 Tayta Diosmi yanapawaqniyqa.
Yanapawaqniykuna ukupim
yanapawan payqa.
Cheqniqniykunatam qawasaq,
vencesqatam qawasaq.
8 Runakunapi hapipakunamantaqa
Tayta Diosllapim confiakunanchik.
9 Kamachikuqkunapi hapipakunamantaqa
Tayta Diosllapim confiakunanchik.
10 Llapallan nacionmanta
runakunam muyuriruwanku.
Aswanqa Tayta Dios
yanapawaptinmi vencerurqani.
11 Muyuriwaspankum
chawpicharuwanku.
Aswanqa Tayta Dios
yanapawaptinmi vencerurqani.
12 Abejakuna hinam muyuriruwanku.
Kichkapi nina hinam ruparunku.
Aswanqa Tayta Dios
yanapawaptinmi vencerurqani.
13 Urmaykunaypaqmi paykuna tanqaykuwarqa,
ichaqa Tayta Diosmi yanapaykuwarqa.
14 Tayta Diosmi kallpanchawaqniyqa.
Alabanaypaqmi takisaq ñoqaqa.
Paytaqmi salvaqniyqa karurqa.
15 Allin ruraqkunapa
wasinpiqa kusikuywanmi qaparichkanku.
Salvasqa kasqankumantam
kusikuywan qaparichkanku:
Tayta Diosqa atiyninwanmi
vencerun,
nispam nichkanku.
16 Tayta Diospa atiyninqa
admirakuypaqmi,
nispam nichkanku.
Tayta Diosqa atiyninwanmi
vencerun,
nispam nichkanku.
17 Manam wañusaqchu ñoqaqa
aswanqa kawsasaqmi.
Kawsasaqqa Tayta Diospa
rurasqankunamanta willakunaypaqmi.
18 Tayta Diosmi sinchita castigawarqa
ichaqa manam wañunaykamachu castigawarqa.
19 Allin kaqman yaykuna
punkukunatayá kichawaychik.
Tayta Dios alabaq
yaykunaypaqyá kichawaychik.
20 Tayta Diospa punkunmi chayqa.
Chaynintam yaykun allin ruraqkunaqa.
21 Dios Taytalláy,
uyarimuwasqaykiraykum graciasta qomullayki.
Salvaqniy kasqaykiraykum graciasta qomullayki.
22 Wasi perqaqkunapa
wischupakusqanku rumiqa
cimientopi eskinan hapiq
rumiñam rikurirurqa.
23 Kaytaqa rurarun Tayta Diosmi.
Kay qawasqanchikqa admirakuypaqmi.
24 Chay punchawqa
Tayta Diospa rurasqanmi.
Chay punchawpiqa
kusikusunchikmi.
25 Dios Taytalláy,
ruegakamullaykim,
kunanyá salvaykullawayku.
Dios Taytalláy,
ruegakamullaykim,
kunanyá allinchaykuwayku.
26 Alabasqayá kachun
Tayta Diospa sutinpi hamuqqa.
Tayta Diospa templonmantam
mañapuchkaykiku bendicionnintaqa.
27 Tayta Diosllam Diosqa.
Payllam kanchariwaqninchikqa.
Kallmakunatayá hapiychik.
Fiestapaqyá huñunakuychik.
Altarkamayá asuykamuychik.
28 Diosniy kasqaykiraykum
graciasta qosqayki.
Diosniy kasqaykiraykum
qamta hatunchasqayki.
29 Allin kasqanraykuyá
Tayta Diosman graciasta qoychik.
Payqa wiñaypaq kuyapayakuq kasqanraykuyá
Tayta Diosman graciasta qoychik.