Tayta Diosqa manam taytacha-mamachakuna hinachu.
115
Dios Taytalláy,
alabasqaqa kasaqku
amayá ñoqaykuchu.
Qamllam alabasqaqa kanayki
manam ñoqaykuchu.
Kuyapayakuq kasqaykimantam
alabasqa kanayki.
Confiakunapaq kasqaykimantam
alabasqa kanayki.
2 Imanasqataq runakunaqa tapunakunku:
¿Maypitaq Israel castakunapa
Diosninkuqa kachkan?
nispa.
3 Chaymi contestaniku:
Diosniykuqa hanaq pachapim kachkan.
Payqa tukuy munasqantam ruran,
nispa.
4 Paykunapa taytacha-mamachankuqa
qori-qollqellam.
Tukuy chaykunaqa
runakunapa rurasqankunallam.
5 Simiyoq kaspapas
manam rimankuchu.
Ñawiyoq kaspapas
manam qawakunkuchu.
6 Rinriyoq kaspapas
manam uyarinkuchu.
Senqayoq kaspapas
manam muskinkuchu.
7 Makiyoq kaspapas
manam llachpankuchu.
Chakiyoq kaspapas
manam purinkuchu.
Kunkayoq kaspapas
manam qaparinkuchu.
8 Chaykunamanmi rikchakun
chaykuna ruraqkunapas.
Chaykunamanmi rikchakun
chaykunapi confiakuqkunapas.
9 Israel castakuna,
Tayta Diospiyá confiakuychik.
Paymi ñoqanchiktaqa yanapaykuwanchik.
Paymi ñoqanchiktaqa defiendeykuwanchik.
10 Aaron castakuna,
Tayta Diospiyá confiakuychik.
Paymi ñoqanchiktaqa yanapaykuwanchik.
Paymi ñoqanchiktaqa defiendeykuwanchik.
11 Tayta Dios respetaqkuna,
Tayta Diospiyá confiakuychik.
Paymi ñoqanchiktaqa yanapaykuwanchik.
Paymi ñoqanchiktaqa defiendeykuwanchik.
12 Tayta Diosmi yuyarirun ñoqanchikmantaqa.
Paymi bendeciwasunchik ñoqanchiktaqa.
Israel castakunatam bendecinqa.
Aaron castakunatam bendecinqa.
13 Respetaqninkunatam Tayta Diosqa bendeciwasun.
Hatuntapas-taksatapas paymi bendeciwasun.
14 Tayta Diosyá mirachisunkichik achkanpi.
Churikichiktapas mirachichunyá achkanpi.
15 Cielokunatapas unanchaq
Tayta Diosmi bendecisunkichik.
Kay pachatapas unanchaq
Tayta Diosmi bendecisunkichik.
16 Tayta Diospam hanaq pachaqa.
Kay pachatañataqmi runakunaman qorqa.
17 Wañusqakunaqa manañam
Tayta Diostaqa alabankuñachu.
Upallaruqkunapa kasqanman
uraykuqkunaqa manam alabankuñachu.
18 Ñoqanchikqa Tayta Diostam alabasunchik.
Kunanmanta wiñaykamam Tayta Diosta alabasunchik.
¡Aleluya!