Tayta Diosman gracias qonapaq
116
Qayakullasqayta uyariykuwasqanraykum
Tayta Diosta kuyani.
Ruegakullasqayta uyariykuwasqanraykum
Tayta Diosta kuyani.
2 Chaylla uyariwasqanraykum
paytaqa mañakusaq.
Ñoqallayqa kawsanaykamam
paytaqa mañakusaq.
3 Wañuymi waskawanpas
watasqata hina chaqnarullawan.
Wañunayaywan ñakarichkaqta hinam
ñoqataqa hapirullawan.
Sasachakuywan llakikuyllam
ñoqallaytaqa hapirullawan.
4 Hinaptinmi Tayta Diosta qayakurqani.
Libraykuwananpaqmi Tayta Diosta qayakurqani.
5 Tayta Diosqa kuyapayakuqmi.
Tayta Diosqa allinlla ruraqmi.
Diosninchikqa llakipayakuqmi.
6 Tayta Diosqa waqaychanmi
pisi experienciayoq runakunataqa.
Llumpay muchuypi kachkaptiymi
salvaykuwarqa ñoqataqa.
7 Sonqollaymi kunanqa hawkayarunña.
Tayta Dios allinyaykachiptinmi
hawkayarunña.
8 Wañunaymanta libraykuwasqanraykum,
waqanaymanta libraykuwasqanraykum,
urmanaymanta harkaykuwasqanraykum
9 Tayta Diosllapaqña kawsasaq.
Kawsaqkunapa allpanpim kawsasaq.
10 Hatun llakikuypim kachkani,
nisparaqmi confiakurqani.
11 Lliw runaqa llullam,
nispaymi llutanpi rimarqani.
12 Ñoqallayqa ¿imatataq
Tayta Diosmanqa kutichisaq?
Lliw allinyaykachiwasqanmantaqa
¿imatataq paymanqa kutichisaq?
13 Kusisqam salvacionta chaskisaq.
Tayta Diostam ñoqaqa qayakusaq.
14 Tayta Diosmanmi prometekusqaykunata
cumplisaq.
Llapallan runakunapa qayllanpim
cumplisaq.
15 Diosman sonqo runakuna wañukuptinqa
manam yanqallapaqchu hapin Tayta Diosqa.
16 Dios Taytalláy,
serviqnikim ñoqaqa kallani.
Serviqnikipa wawanmi kallani.
Qanmi watawasqankuta tipirurqanki.
17 Graciasta qonaypaqmi
animalta wañuchipusqayki.
Qam Tayta Diostam
ñoqaqa qayakamusqayki.
18 Tayta Diosmanmi prometekusqaykunata
cumplisaq.
Llapallan runakunapa qayllanpim
cumplisaq.
19 Dios Taytalláy,
temploykipa pationkunapim
ñoqaqa cumplisaq.
Jerusalen llaqtapim
ñoqaqa cumplisaq.
¡Aleluya!