paytayá alabaychik.

Tayta Diospa serviqninkuna,

sutinraykuyá alabaychik.

2 Kunanmanta wiñaykamayá

Tayta Diosqa alabasqa kachun.

Kunanmanta wiñaykamayá

sutinrayku alabasqa kachun.

3 Intipa qespimunan lawmantaraqyá

Tayta Diosqa alabasqa kachun.

Intipa seqaykunan lawkamaraqyá

Tayta Diosqa alabasqa kachun.

4 Tayta Diosqa llapallan nacionkunapa

hawanpiraqmi kachkan.

Alto cielokunamantapas

kanchariqraqmi payqa kachkan.

5 Yupaychasqanchik Tayta Dios hinaqa

manam pipas kanchu.

Alto-altopi tiyaspa gobiernaq hinaqa

manam pipas kanchu.

6 Chayna kachkaspapas

kumuykusparaqmi cielokunata qawaykamun.

Chayna kachkaspapas

kumuykusparaqmi kay pachata qawaykamun.

7 Payqa wakcha runatapas

allpamantaraqmi hoqariykun.

Payqa mana imayoqtapas

qopa patamantaraqmi hoqariykun.

8 Paytaqa hoqariykun

kamachikuqkunawan tiyaykachinanpaqmi.

Paytaqa hoqariykun

runamasinkuna kamachiqkunawan tiyaykachinanpaqmi.

9 Payqa mana wachakuqtapas

wawasapatam ruraykun.

Chay warmiñataqmi

wawasapa kasqanrayku kusikun.

¡Aleluya!