Tayta Dios respetaq runapa kusikusqanmanta
¡Aleluya!
112
¡Mayna kusisqam
Tayta Dios respetaq runaqa!
¡Mayna kusisqam
kamachikuyninkunapi kusikuq runaqa!
2 Paypaqa mirayninpas kay pachapim
sinchi atiyniyoq kanqaku.
Mana pantaq runapa mirayninqa
bendecisqam kanqaku.
3 Payqa wasinpipas
qori-qollqeyoqmi kachkan.
Payqa wasinpipas
kapuqniyoqmi kachkan.
Payqa wiñaypaqmi
allinta rurachkan.
4 Chay runaqa tutayaypim kanchay hina.
Mana pantaqkunapaqmi kanchay hina.
Chay runaqa kuyapayakuqmi.
Chay runaqa llakipayakuqmi.
Payqa allinkunata ruraqmi.
5 Allin runaqa kuyapayakuqmi.
Allin runaqa prestakuykuqmi.
Payqa negocionpipas concienciayoqmi.
6 Allin ruraq runaqa
wiñaypaq mana urmaqmi kanqa.
Allin ruraq runaqa
wiñaypaqmi yuyarisqa kanqa.
7 Mana allin noticiamantaqa
manam manchakunchu.
Tayta Diospi confiakusqanraykum
mana imapas qokunchu.
8 Qaqa hina sayaspa
mana manchakuqmi kanqa.
Enemigonkuna
vencechikusqantam qawanqa.
9 Wakchakunamanmi imallantapas aypuykarin.
Wakchakunamanmi imallantapas qoykarin.
Allin rurasqanqa wiña-wiñaypaqmi kanqa.
Allin reqsisqa kaspanmi respetasqa kanqa.
10 Mana allin ruraq runaqa
payta qawaspanmi piñapayanqa.
Kachupakusparaq qawaptinmi
kallpanpas chinkarirunqa.
Mana allin ruraq runapa
munasqanqa pasaypaqtam chinkarunqa.