Diospa kuyapayakuyninmanta
Samana punchawpi Diosman takinapaq
92
Dios Taytalláy
¡mayna sumaqmi qanman gracias qoyqa!
Alto-altopi kaq Diosnilláy
¡mayna sumaqmi qanman takiyqa!
2 ¡Mayna sumaqmi tempranonpas
kuyapayakuynikimanta willakuyqa!
¡Mayna sumaqmi tutankunapas
confiakunapaq kasqaykimanta willakuyqa!
3 ¡Mayna sumaqmi charangowanraq takiyqa!
¡Mayna sumaqmi hatun arpawan takiyqa!
¡Mayna sumaqmi taksa arpawan takiyqa!
4 Dios Taytalláy,
rurasqaykikunawanmi ñoqallayta kusichiwarqanki.
Rurasqaykikunamantam kusikuywan takichiwanki.
5 Dios Taytalláy
¡mayna hatunmi rurasqaykikunaqa!
¡Mayna sasam piensasqaykikunaqa!
6 Asno runallam
chaykunataqa mana yachanchu.
Sonso runallam
rurasqaykikunataqa mana entiendenchu.
7 Mana allin runakunam
qora hina ikllirimun.
Mana allin runakunam
qora hina waytarimun.
Chaywanpas chinkachisqam kanqaku.
Wiñaypaq chinkachisqam kanqaku.
8 Dios Taytalláy,
qanmi ichaqa alto-altopi kachkanki.
Qanmi ichaqa wiña-wiñaypaq kachkanki.
9 Dios Taytalláy,
enemigoykikunaqa
chinkachisqamá kanqaku.
Llapallan mana allin ruraqkunaqa
cheqechisqamá kanqaku.
10 Qanmi ichaqa kallpanchaykuwanki.
Kallpasapa torota hinam kallpanchaykuwanki.
Fino aceitewanmi talliykuwanki.
11 Wateqawaqniykunapa vencechikusqantam rikuykusaq.
Daño ruraqniykunapa vencechikusqantam uyarisaq.
12 Allin ruraq runaqa
palmera sacha hinam mastarikun.
Allin ruraq runaqa
Libano monte cedro hinam chutarikun.
13 Tayta Diospa templonpi plantasqa hinam kachkan.
Diosninchikpa templonpa pationpim wiñachkan.
14 Chay sachaqa machuyaruspanpas
ruruyoqmi kanqa.
Chay sachaqa hatu-hatun
rapisapallañam kanqa.
15 Chaynapim willakunqaku
Tayta Diosqa amparaqniy kasqanta.
Chaynapim willakunqaku
Tayta Diosqa mana faltayoq kasqanta.
Chaynapim willakunqaku
payqa mana huchayoq kasqanta.