Tayta Diosllam amparakunanchikqa
91
Alto-altopi kaqpa pakaykusqanmi,
Tukuy Atiyniyoqpa llantuykusqanmi
2 Tayta Diosta nini:
Pakakuna wasi hinam
qamqa kanki,
nispa.
Amparakuna wasi hinam
qamqa kanki,
nispa.
Diosnilláy,
ñoqaqa
qampim confiakusaq,
nispa.
3 Pakasqa toqllamantam
payqa libraykusunki.
Wañuchiq onqoymantam
payqa libraykusunki.
4 Purankunawan hinam
payqa pakaykusunki.
Raprankunapi hinam
payqa amparasunki.
Confiakunapaq kallasqanmi
harkaykusunki.
Harkachikuna arma hinam
harkaykusunki.
5 Manam manchakunkichu
tutayaypi kaqtapas.
Manam manchakunkichu
punchaw flechasqamantapas
6 nitaq tutapi puriq onqoymantapas
nitaq rupaypi wañuchiq pestemantapas.
7 Ladoykipim waranqa runa wañunqa.
Alleqnikipim chunka waranqa wañunqa.
Manam imanasunkichu qamtaqa.
8 Qamqa mana allinkunatam
qawaylla-qawanki.
Mana allin ruraqkunapa
castigontam rikunki.
9 Tayta Diosta pakaykusuqnikipaq
churasqaykiraykum,
Alto-altopi Kaqta yachanayki wasipaq
hapisqaykiraykum
10 ima mana allinpas
mana imanasunkichu,
nitaqmi onqoypas
wasikiman chayamusunkichu.
11 Qamraykum angelninkunata kamachinqa
mayta riptikipas waqaychasunaykipaq.
12 Paykunam hapisunki rumiman
chakikita mana takakunaykipaq.
13 Leonkunapa,
culebrakunapa
kasqantam purinki.
Uña leonkunatam,
venonoyoq
culebrakunatam sarunki.
14 Tayta Diosmi nin:
Ñoqata kuyawasqanraykum
ñoqapas payta librasaq.
Ñoqata reqsiwasqanraykum
seguro sitiopi churasaq.
15 Qayakamuwaptinmi ñoqa contestasaq.
Sasachakuyninpim payta yanapasaq.
Libraspaymi reqsisqata rurasaq.
16 Unay watakunatam kawsachisaq.
Pay salvasqaytam qawachisaq.