TAWA KAQ LIBRO (90-106)
Runakunaqa pisi watalla kawsasqanmanta
Diospa runan Moisespa mañakusqan
90
Señornillayku,
yachanayku
wasi hinam
qamqa kanki.
Yachakunayku wiñaypaqña
wasi hinam
qamqa kanki.
2 Orqokunata manaraqpas rikuriykachichkaspaykim,
allpa pachata manaraqpas rikuriykachichkaspaykim,
tukuy imanta manaraqpas rikuriykachichkaspaykim
wiña-wiñaypaq qamqariki Diosllapuni kallachkanki.
3 Runatam ñutuypaq ñuturullanki.
Allpayaychik,
nispamya nirunki.
4 Qampaqa waranqa watakunapas
qayna punchaw pasaruq hinallam.
Qampaqa waranqa watakunapas
kimsa hora tutapi hinallam.
5 Lloqllapa apasqan hinatamiki
runataqa chinkarachillanki.
Puñuyta chinkachiq hinallamiki
vidantaqa chinkarachillanki.
Tutapay iklliruq pastota hinam
vidantaqa rikurirachinki.
6 Tutapay ikllispam payqa waytarun.
Tardenñataqmi qawispa chakirun.
7 Piñakuruspaykim llapaykuta
tukuruypaq-tukuruwankiku.
Rabiakuruspaykim mosqoypi hina
qamqa rikurirachiwankiku.
8 Pasaypaq hukmanlla rurasqaykutam
ñawikiwan qamqa qawaykurullanki.
Huchallaykutapas sutillatam
qamqariki rikuriykachinki.
9 Piñakuruptikim vidallaykupas
pasaypaqta tukurullachkanña.
Runapa samaynin hinallataqmi
vidaykuqa chinkarullachkanña.
10 Runapa kawsaypaq-kawsasqaykuqa
qanchis chunka watallañamiki.
Allinta takyaqqa kawsallaniku
pusaq chunka watallañamiki.
Ichaqa chaywanpas chay wataykuqa
llakikuywan sasachakuyllañam.
Chay watakunaqa chayllam pasarun.
Vidaykupas chaynam chinkaykurun.
11 Piñakuynikipa rawrasqantaqa
manam pipas entiendellanmanchu.
Manchakuyllapaqña rabiaykitaqa
manam pipas entiendellanmanchu.
12 Vidayku tukuruq kallasqantaqa
qampunitaq yachachillawayku.
Yuyaywan ñoqayku kawsanaykupaq
qampuniña yachachillawayku.
13 Dios Taytalláy,
ama unamuspayá kutirikamullawayku.
Kay serviqnikikunatayá llakipayarillawayku.
14 Achikyamuptinyá kuyakuynikiwan huntaykuwayku.
Kawsanaykukamam kusisqa takisaqku.
15 Ñakarichiwasqaykiku punchawkunaman hinayá
kusirichillawayku.
Mana allin watakuna kawsasqaykuman hinayá
kusirichillawayku.
16 Serviqnikikunamanyá
rurasqaykikuna rikurichun.
Mirayninkumanyá
sumaq kayniki rikurichun.
17 Señor Diosnillayku,
favorecewaykuyá
tukuy rurasqayku allin lloqsinanpaq.
Favorecewaykuyá
tukuy rurasqayku chayna kananpaq.