Davidwan Dios contrato rurasqanmanta
Yachachinanpaq Ezra casta Etanpa yachachikuy takisqan
89
Dios Taytalláy,
kuyapayakuq kasqaykimantam
wiñaypaq takisaq.
Confiakunapaq kasqaykimantam
tukuy tiempopi willakullasaq.
2 Allin cimientasqa wasi hinam
qamqa wiñaypaq kuyapayakuq kanki.
Allin takyachisqa cielokuna hinam
qamqa wiñaypaq confiakuna kanki.
3 Qanmi nirqanki:
Akllasqaywanmi contratota rurarqani,
nispa.
Serviqniy Davidmanmi prometerqani,
nispa.
4 Ñoqaqa paymanmi prometerqani:
“Miraynikikunatam rey kanankupaq
wiñaypaq takyachisaq” nispa.
“Rantikipi wiñaypaq gobiernanankupaqmi
churaykusaq” nispa.
(Samariy)
5 Dios Taytalláy,
hanaq pachapi kaqkunam
milagroykikunamanta alabasunki.
Sapaqchasqaykikuna huñunakuptinkum
confiakunapaq kasqaykimanta alabasunki.
6 Dios Taytalláy,
cielokunapi kaqkunamantaqa
¿pitaq igualasunkiman?
Diospa churinkunamantaqa
¿pitaq rikchakusunkiman?
7 Sapaqchasqakuna huñunakuptinkum
qayllaykipi katkatatachinki.
Muyuriqnikipi kaqkunamantapas
aswan manchakuypaqmi kanki.
8 Llapallan Kamachiq Dios Taytalláy
¿pitaq qam hina atiyniyoqqa kanman?
Dios Taytalláy ¿pitaq qam hina
tukuypi confiakuna Diosqa kanman?
9 Qanmi hoqarikuruq lamar qochapi munaychakunki.
Qamqa hatun olankunatam tanirachinki.
10 Rahabwan sutichasqa Egipto naciontam
guerrapi peleaqta hina vencerurqanki.
Hatun atiynikiwanmi
enemigoykikunata cheqerachirqanki.
11 Qampam cielokunapas.
Qampam kay pachapas.
Kay pachataqa qanmi unancharqanki.
Tukuy imankunatapas qanmi unancharqanki.
12 Norte lawpi kaqkunataqa
qanmi unancharqanki.
Surlawpi kaqkunataqa
qanmi unancharqanki.
Tabor Moqom kusikuspa alabasunki.
Hermon Orqon kusikuspa alabasunki.
13 Atiyniyoqmi qampa brazoykiqa.
Kallpayoqmi qampa makikiqa.
Tukuy venceqmi alleq makikiqa.
14 Gobiernaspaykiqa allintapunim ruranki.
Gobiernaspaykiqa allintapunim arreglanki.
Gobiernaspaykiqa sutillatam kuyapayakunki.
Sutilla confiakunam qamqa kanki.
15 Dios Taytalláy
¡mayna kusisqam
yachaywan alabasuqniki runakunaqa!
¡Mayna kusisqam
kancharichkaq qayllaykipi kawsaqkunaqa!
16 Paykunam tukuy tiempopi
sutikirayku kusikunku.
Allinkuna rurasqaykiraykum
hoqarisqa kanku.
17 Paykunataqa atiynikiwanmi sumaqchanki.
Favornikiwan kallpanchaqniykum qamqa kanki.
18 Tayta Diospam munaychakuqninchikqa.
Israelpa Chuya Diosninpam reyninchikqa.
19 Revelawaspaykim huk kutipi rimarqanki.
Qanman sonqo runakunamanmi nirqanki:
Valeroso soldadoytam yanaparqani.
Runaykunamanta akllasqaytam hatuncharqani.
20 Ñoqapa serviqniy Davidtam tarirqani.
Rey kananpaqmi aceitewan sapaqcharqani.
21 Atiyniywanmi paytaqa takyachisaq.
Atiyniywanmi paytaqa kallpanchasaq.
22 Enemigonkunaqa manam paytaqa atacanqachu.
Mana allin runakunaqa manam ñakarichinqachu.
23 Enemigonkunatam qayllanmanta chinkarachisaq.
Cheqniqninkunatam ñoqaqa wañurachisaq.
24 Confiakuwananpaqmi paytaqa churasaq.
Paytaqa ñoqam kuyapayasaq.
Sutiyraykum atiyniyoqta rurasaq.
25 Lamar qochamantaraqmi
munaychakunanpaq churasaq.
Mayukunapa kasqankamaraqmi
munaychakunanpaq churasaq.
26 Paymi kaynata qayakuwanqa:
“Qanmi taytay kanki” nispa.
“Qanmi Diosniy kanki” nispa.
“Amparaykuqniymi qamqa kanki” nispa.
“Salvaqniymi qamqa kanki” nispa.
27 Piwi churipa derechontam ñoqaqa qosaq.
Kay pachapi reykunapa hawanpim churasaq.
28 Payta kuyaspam
prometesqayta cumplisaqpuni.
Paywan contratoytam
mana faltaspay cumplisaqpuni.
29 Mirayninkunatam wiñaypaq gobiernachisaq.
Hanaq pacha kanankamaqa
gobiernontam takyachisaq.
30 Sichu paypa mirayninkuna kamachikuyniyta
saqeruptinkuqa,
sichu kamachisqayman hina
mana kawsaptinkuqa,
31 sichu decretoykunata sarutyaptinkuqa,
sichu kamachikuyniykunata
mana kasukuptinkuqa
32 mana kasukusqankumantam varawan castigasaq.
Mana allin rurasqankumantam azotewan castigasaq.
33 Chaywanpas kuyapayakuyniytaqa
manam qechurusaqchu.
Chaywanpas cheqap rimasqaytaqa
manam negarusaqchu.
34 Contratoytaqa manam pakisaqchu.
Rimasqaytaqa manam tikrasaqchu.
35 Chuya kasqayraykum huk kutillata
jurarqani ñoqaqa.
Manataqmi Davidtaqa
llullakusaqchu ñoqaqa.
36 Mirayninkunam wiñaypaq gobiernanqa.
Ñawpaqniypi inti hinam gobiernon kanqa.
37 Gobiernonmi killa hina
takyachisqa kanqa.
Puyukunapi testigo hinam
gobiernon kanqa.
(Samariy)
38 Chaywanpas piñakuruspaykim
reypaq churasqaykita qepanchakururqanki.
Chaywanpas piñakuruspaykim
aceitewan sapaqchasqaykita wischupakururqanki.
39 Serviqnikiwan contrato rurasqaykitam
mana kaqman churarunki.
Paypa coronantapas
pampakamaraqmi wischurunki.
40 Mankaparurqankim murallankunata.
Purmarachirqankim llaqtankunata.
41 Llapallan pasaqkunam suwakunku.
Vecinonkunam paytaqa burlakunku.
42 Contranpi kaqkunatam kallpancharunki.
Llapallan enemigonkunatam kusirachinki.
43 Laqoyarachinkim espadanpa filontapas.
Manam sayarichirqankichu guerrapipas.
44 Sumaqllaña kaynintam tukurachirqanki.
Paypa gobiernontam tukurachirqanki.
45 Mozo kaynintam menosyarachirqanki.
Penqaymanmi paytaqa churarurqanki.
(Samariy)
46 Dios Taytalláy ¿wiñaypaqchu pakakurunki?
¿Wiñaypaqchu nina hina ruparinqa piñakuyniki?
47 Amayá qonqaychu
wataykunaqa pisilla kasqanta,
unanchasqayki runaqa
yanqallapaq kawsasqanta.
48 ¿Pi runaraq
kawsaspa mana wañuqqa kanman?
¿Pi runaraq
wañusqakunapa kasqanmanta librakunman?
(Samariy)
49 Señorlláy ¿maytaq ñawpaq tiempopi
kaq kuyakuyniki?
¿confiakunapaq kasqaykirayku
Davidman juramentasqayki?
50 Señorlláy,
yuyariyá kay serviqnikikunataqa
insultawasqankuta.
Yuyariyá achkallaña runakunapa
insultawasqankuqa sonqoykupi kasqanta.
51 Dios Taytalláy,
chaynatam enemigoykikuna insultawanku.
Aceitewan sapaqchasqaykitam insultawanku.
Tukuy ima rurasqaypim insultawanku.
52 ¡Tayta Diosyá alabasqa kachun!
¡Wiña-wiñaypaqyá chayna kachun!