Wañuy patanpiña kaspa mañakusqan
Takiqkunapa maestronpaq. “Llakisqallaña ñakariymanta” tonopim Coreypa mirayninmanta kaq Ezra casta Heman qellqarqa kay yachachikuy takita.
88
Dios Taytalláy,
punchawmi qayakamullayki.
Salvaq Diosnilláy,
tutanmi qayakamullayki.
2 Mañakamusqaytayá chaskiykullaway.
Qayakamusqaytayá uyariykuway.
3 Pasa-pasaypaqtañam ñakarillachkani.
Wañuypapas patanpiñam kallachkani.
4 Pampanapaq hinañamya kallachkani.
Eqo mana kallpayoqñam kallachkani.
5 Wañusqakunawan wischusqañam
ñoqaqa kachkani.
Guerrapi wañuruq pampasqa
hinañam kachkani.
Paykuna hinam
mana yuyarisqaykiña kachkani.
Paykuna hinam
mana yanapasqaykiña kachkani.
6 Uku-uku uchkumanmi wischuykuwanki.
Tutayaq ukumanraqmi wischuykuwanki.
7 Ñoqaqa kachkani
piñakuynikipa ñitisqan hinaraqmi.
Ñoqataqa ruraruwanki
llapa olakunapa pampasqanta hinaraqmi.
(Samariy)
8 Reqsisqaykunatam ñoqamanta karuncharuwanki.
Paykunapa millakunantañam ruraruwanki.
Preso hina manaña lloqsiqtam ruraruwanki.
9 Chaynapim ñoqaqa ñawsayaruchkaniña.
Anchata waqaspaymi ñawsayaruchkaniña.
Dios Taytalláy,
sapa punchawmi qayakamullayki.
Qanmanmi makillayta hoqarimullayki.
10 ¿Wañusqakunapaqchu ruraruwaq milagroykikunata?
¿Icha wañuqkunachu qosunkiman graciasta?
(Samariy)
11 ¿Sepulturapichu
kuyakuynikimanta rimanqaku?
¿Wañusqakunapa kasqanpichu
confianza kasqaykimanta rimanqaku?
12 ¿Sinchi tutayaypichu
milagroykikunata yachanqaku?
¿Manaña imapas yuyarina sitiopichu
allin rurasqaykimanta yachanqaku?
13 Dios Taytalláy,
ñoqam ichaqa qayakamullayki.
Tutapaymantam mañakamullayki.
14 Dios Taytalláy
¿imanasqataq qepanchakuruwanki?
¿Imanasqataq ñoqamanta pakakurunki?
15 Mozo kasqaymantam ñoqaqa ñakarirqani.
Wañuy patanpiñam ñoqaqa rikurirurqani.
Mancharichiwaptikim
mosqoypi hinaña rikurirurqani.
16 Ñoqapaq rabiakusqaykim hayparullawanña.
Mancharichiwasqaykim chinkarachiwachkanña.
17 Tukuy punchaw yakupa
muyurusqan hinam kallachkani.
Chay yakupa pasaypaq
chawpicharusqan hinam kallachkani.
18 Kuyawaqniykunatam karuncharurqanki.
Amigoykunatam ñoqamanta karuncharurqanki.
Tutayayllatañam amistadniypaqpas churaykapuwanki.