Yanapananpaq Diosta mañakusqan
Davidqa mañakusqan
86
Dios Taytalláy,
uyariykullawayá.
Dios Taytalláy,
contestaykullawayá.
Ñakariypim kallachkani.
Llakikuypim kallachkani.
2 Qanman sonqollaña kallasqayraykuyá
waqaychaykuway.
Qanman hapipakuq serviqllaykitayá
salvaykullaway.
Qamlla Diosnillayqa kasqaykiraykuyá
salvaykullaway.
3 Señorlláy,
llakipayariykullaway.
Tukuy tiempopim qayakamullayki.
4 Kay serviqnikitayá kusiriykachillaway.
Señorlláy,
qamtam mañakullayki.
5 Señorlláy,
hucha pampachaykuq
allin sonqom qamqa kanki.
Llapallan qayakusuqnikita
kuyapayaykuqmi qamqa kanki.
6 Dios Taytalláy,
mañakullasqaytayá uyariykullaway.
Ruegakullasqaytayá chaskiykullaway.
7 Sasachakuypi kaspaymi qayakamullayki.
Qamqa qayakamusqaytam contestaykuwanki.
8 Señorlláy,
qam hina
Diosqa manam kanchu.
Rurasqaykikunata hinaqa
manam pipas ruranchu.
9 Señorlláy,
nacionkunapi
llapallan runakunatam unancharqanki.
Paykunam adoraqniki hamuspanku
sutikimanta yupaychasunki.
10 Qamqa sinchi atiyniyoqmi kanki.
Admirakuypaq kaqkunatam ruranki.
Sapallaykim qamqa Dios kanki.
11 Dios Taytalláy,
munasqaykiman hina
kawsaytayá yachachillaway.
Yachachisqaykiman hina
puriytayá yachachillaway.
Qamtaña respetanaypaqyá
iskayrayaq sonqoyta hukllaway.
12 Señor Diosnilláy,
tukuy sonqoywanmi alabasqayki.
Wiñaypaqmi qamta yupaychasqayki.
13 Ñoqallaytaqa ancha-anchatam
kuyapayawanki.
Wañusqakunapa kasqanmantam
libraykuwarqanki.
14 Diosnilláy,
hoqarikuq runakunam
ñoqallayta atacawachkanku.
Manchakuypaq runakunam
wañurachiwayta munachkanku.
Paykunaqa qanmantapas
mana piensariqmi kanku.
15 Señorlláy,
qanmi ichaqa kanki llakipayakuq.
Diosnilláy,
qanmi ichaqa kanki kuyapayakuq.
Qamqa kanki anaq piñakuqmi.
Qamqa kanki ancha kuyakuqmi.
Qamqa kanki confiakuna Diosmi.
16 Qawarimuspaykiyá llakipayariykullaway.
Kay serviqnikitayá kallpanchaykullaway.
Serviqnikipa wawantayá salvaykullaway.
17 Allinniypaqyá milagrota ruraykuy.
Cheqniqniykunapas qawananpaqyá
ruraykuy.
Cheqniqniykunapas penqarikunankupaqyá
ruraykuy.
Dios Taytalláy,
qanmi
ñoqataqa yanapaykuwarqanki.
Dios Taytalláy,
qanmi
ñoqataqa consuelaykuwarqanki.