¡Dios Taytalláy, salvaykullawayku!
Takiqkunapa maestronpaq, Diosman Coreypa mirayninkunapa takisqan
85
Dios Taytallayku,
allpaykitam favorecerqanki.
Jacobpa castan presokunatam
kutichimurqanki.
2 Runaykikunapa mana allin rurasqantam
pampachaykurqanki.
Paykunapa llapa huchallikusqantam
pakaykurqanki.
(Samariy)
3 Llapa piñakuynikitam anchurirachinki.
Hatun rabiakuynikitam asurirachinki.
4 Salvaq Diosnillayku,
ñoqaykutayá kutirichiwayku.
Contraykupi piñakuynikita
amachaspayá kutirichiwayku.
5 ¿Wiñaypaqchu contraykupi piñakunki?
¿Mirayniykupapas contranpichu rabiakunki?
6 Runaykikunataqa ¿manachum
kaqllamanta kallpanchawankikuman?
Runaykikuna kusikunaykupaqqa
¿manachum kallpanchawankikuman?
7 Dios Taytallayku,
kuyapayariykullawaykuyá.
Dios Taytallayku,
salvaykullawaykuyá.
8 Tayta Diospa nisqantam uyarisaq ñoqaqa.
Runakunamanmi hawkaña kanankupaq rimanqa.
Payman sonqo runakunamanmi rimanqa.
Sonso hina manaña ruranankupaqmi rimanqa.
9 Cheqaptapunim Diosqa hichpallapi kachkan
respetaqninkunata salvananpaq
chaynapi allpanchikpi
ancha reqsisqa kananpaq.
10 Tayta Diospa kuyapayakuyninwan
cumpliq kayninqa tupanakunpunim.
Allin ruraq kayninwan
hawkayachikuq kayninqa hukllawanakunpunim.
11 Tayta Diospa cumpliq kayninqa
kay pachapi suti reqsiyllam kanqa.
Tayta Diospa allin ruraq kayninqa
hanaq pachamantam reqsichimusqa kanqa.
12 Tayta Diosmi allinkunata qonqa.
Allpanchikmi sinchita rurunqa.
13 Diospa ñawpaqnintaqa
allin rurasqanmi rinqa.
Chayninta purinanpaqmi
ñanta alistanqa.