Diospa templonman riy munasqan
Takiqkunapa maestronpaq, Gat llaqtapi yachaqkunapa tononwan, Diosman Coreypa mirayninkunapa takisqan
84
Llapallan Kamachiq Dios Taytalláy
¡mayna kuyayllapaqmi yachakunayki lugarqa!
2 Anchatam munani,
Dios Taytalláy,
qampa templollaykipa pationkunapi kaytaqa.
Wañurinaykamam munallachkani chaytaqa.
Sonqoypi kusisqam Kawsaq Diosnilláy,
tukuy cuerpoywanmi takimullasaq qanmanqa.
3 Llapallan Kamachiq Dios Taytalláy,
pichinchuruchallapas qesachallantam rurakun.
Wayanakuychapas,
Rey Diosnilláy,
altarniki chimpanpim mallqochallanpaq rurakun.
4 ¡Mayna kusisqamya
templollaykipi yachaqqa!
Mana samaykuspam
alabasunki qamtaqa.
(Samariy)
5 ¡Mayna kusisqamya
qamllapi kallpanchakuqqa,
temploykimanpas riy munaq runakunaqa!
6 “Waqay” Wayqontaña puriypaq-puriptinkupas
wayqom yakuyoqman tikraypaq-tikrakurunqa,
tarpuy pararaqmi pozoman huntaykurunqa.
7 Aswan-aswanraqmi
kallpata hapillanqaku.
Sionpim Diospa ñawpaqninpiraq
rikurinqaku.
8 Llapallan Kamachiq Dios Taytalláy,
mañakusqayta uyariykullaway sumaqta.
Jacobpa Dios Taytallan,
qampuniyá
tukuy mañakusqayta atiendeykuway sumaqta.
(Samariy)
9 Reynillaykutaqa yanapaykuyá.
qampaq aceitewanraq sapaqchaykusqaykirayku.
10 Waranqantin punchaw huklawpi kanaymantaqa
chulla punchawllapas patioykim aswan allinqa.
Huchallikuqllapa kasqanpi kanaymantaqa
templo punkuykiwan cuentallikuymi allinqa.
11 Inti hinaraqmi kanchaypaq-kanchariykuwan.
Imamantañapas harkaqniymi Taytallay Diosqa.
Ancha reqsisqatam ruraypaq-ruraykullawan.
Kuyakuynillantam qoykuwan Taytallay Diosqa.
Paypa munasqanpi allinneq kawsaqmantaqa
manam qechunqachu qoykusqan allin kaqtaqa.
12 Llapallan Kamachiq Dios Taytalláy
¡mayna kusisqallañam qampi confiakuqkunaqa!