Israel nacionpa enemigonkuna tukusqa kananpaq mañakusqan
Diosman Asafpa takisqan
83
Diosnilláy,
amayá
qamqa samaykuychu.
Diosnilláy,
amayá
mana rimariqqa kaychu.
Diosnilláy,
amayá
qamqa upallakuruychu.
2 Enemigoykikunam qaparkachachkanku.
Cheqnisuqnikikunam hoqarikurunku.
3 Runaykikunapa contranpim
engañollata rimanakurunku.
Nanachikusqaykikunapa contranpim
pakasqallapi rimanakurunku.
4 Paykunam ninakurunku:
Rispayá Israel nacionta
tukuramusunchik,
nispa.
Manaña nacion kananpaqyá
tukuramusunchik,
nispa.
Sutinpas qonqasqa kananpaqyá
tukuramusunchik,
nispa.
5 Contraykipim huk sonqolla
yachanarachikunku.
Contraykipim paykunaqa
contratota rurarunku.
6 Paykunam karqa
Edom casta tropakunawan
Ismael casta tropakuna,
Moab casta tropakunawan
Agar casta tropakuna,
7 Gebal casta tropakunawan
Amon casta tropakuna,
Amalec casta tropakunawan
Filistea casta tropakuna
hinaspa Tiro llaqta tropakuna.
8 Asiria tropakunapas
paykunamanmi hukllawakurunku.
Lot casta runakunapa
kallpanchaqninñam rikurirunku.
(Samariy)
9 Madian runakunata hinayá castigay.
Kamachikuq Sisarata hinayá castigay.
Rey Jabinpa tropankunata hinayá castigay.
Cison Mayupi rurasqaykita hinayá castigay.
10 Endor lawpim chinkachisqa karqaku.
Chakrapaq wanu hinañam rikurirurqaku.
11 Rey Orebta hinayá
kamachiqninkutapas wañuchiy.
Rey Zeebta hinayá
kamachiqninkutapas wañuchiy.
Rey Zebata hinayá
reqsisqa jefenkutapas wañuchiy.
12 Chay reykunam kaynata ninakurqaku:
Diospa qosqan allpatayá
dueñochakurusun,
nispanku.
13 Diosnilláy,
muyuq wayra hinayá
paykunataqa aparuy.
Wayrapa apasqan qopata hinayá
paykunataqa aparuy.
14 Monteta nina rupachkaq hinayá,
orqopi ichu rupaspa lenguachkaq hinayá,
15 sinchi parayoq wayraykiwan
qatikacharuy paykunata.
Sinchi parayoq wayraykiwan
mancharirachiy paykunata.
16 Dios Taytalláy,
paykunatayá penqayman churaruy.
Manchakusunaykipaqyá penqayman churaruy.
17 Wiña-wiñaypaqyá penqayman
churasqa kachunku.
Wiña-wiñaypaqyá
mancharisqa kachunku.
Penqayman churaruptikiyá
wañuruchunku.
18 Sutikiqa Tayta Dioslla
kasqantayá yachachunku.
Kay pachapa altonpiqa qamlla
kasqaykitayá yachachunku.