Huchallikuptinkupas Diospa kuyapayakuyninmanta
Takiqkunapa maestronpaq, Gat llaqtapi yachaqkunapa tononwan Diosman Asafpa takisqan
81
Takiychik kusikuywan
kallpanchaqninchik Diosman.
Kusikuymanta qapariychik
Jacob castakunapa Diosninman.
2 Alabaychik tinyawan,
miski waqaq arpachawan
hinaspa hatun arpawan.
3 Llullu killapi
cornetata tocaychik.
Poqosqa killapi
cornetata tocaychik.
Chay punchawmi
hatun fiestanchik.
4 Israel casta runakunapaqmi
chay decretoqa.
Jacobpa Diosninmi qorqa
chay reglamentotaqa.
5 Chay kamachikuytaqa Diosmi
Josey castakunaman qorqa.
Egiptopa contranpi lloqsispanmi
chaytaqa qorqa.
Mana reqsisqaypa kayna nisqantam
uyarirqani:
6 Llasaq qepimantam
wasaykita samaykachirqani.
Llasaq canastakunamantam
samaykachirqani.
7 Llakikuypi kaspayki
qayakamuwaptikim libraykurqaki.
Rayopa toqyasqan
yana puyumantam contestamurqayki.
Meriba sutiyoq
pukyupa patanpim pruebarqayki.
(Samariy)
8 Runallaykuna,
qamkunaman
willasqaytayá uyariwaychik.
Israelpa castankuna,
amalaya ñoqataña kasukuwaqchik.
9 Huk rikchaq dioskunaqa
amam kapusunkichikchu.
Huk rikchaq dioskunataqa
amam adorankichikchu.
10 Yupaychasqaykichik
Tayta Diosmi
ñoqaqa kani.
Egipto nacionmanta horqomusuqnikichikmi
ñoqaqa kani.
Mallqonkunata maman mikuchichkaq hinam
qamkunatapas mikuchisqaykichik.
Simikichikta kichariptikichikmi
qamkunatapas mikuchisqaykichik.
11 Ichaqa runaykunam
mana uyariwarqakuchu.
Israel castakunam
mana chaskiwarqakuchu.
12 Chayraykum munaysapa
kayninkupi saqerurqani.
Munasqankupiña kawsanankupaqmi
chaynata saqerurqani.
13 Sichu runaykuna ñoqapa nisqayta
uyariwanman karqa,
sichu Israel castakuna nisqayman hinalla
kawsanman karqa,
14 hinaptinqa chayllachá enemigonkuta
venceruyman karqa,
hinaptinqa ñakarichiqnin runakunatachá
castigayman karqa.
15 Ñoqa Tayta Diosta cheqniqniykunam
manchakuspa humillakunmanku karqa.
Wiña-wiñaypaqchá paykunataqa
castigayman karqa.
16 Runaykunatam allinnin trigota
mikuchiyman karqa.
Qaqakunapi avejapa miskinwanmi
saksachiyman karqa.