Allinña kanankupaq mañakusqan
Takiqkunapa maestronpaq, “Amanqay hinam Diospa kamachikuyninqa kachkan” niq tonopi Diosman Asafpa takisqan
80
Israel casta runakunapa
michiqnin Diosnilláy,
uyariykuyá.
Ovejakunata hina Josey casta runakunata
pusaq Diosnilláy,
uyariykuyá.
Querubinwan sutichasqa angelkunapa chawpinpi
tiyaq Diosnilláy,
kanchariykuyá.
2 Efrain casta runakunapa
qayllanpiyá kanchariy.
Benjamin casta runakunapa
qayllanpiyá kanchariy.
Manases casta runakunapa
qayllanpiyá kanchariy.
Atiynikita huktawan
qawachinaykipaqyá hamuwayku.
Ñoqaykuman qampuni
hamuruspayá salvaykuwayku.
3 Diosnillayku,
imayna kasqaykuta hinayá
allinyaykachiwayku.
Salvasqa kanaykupaqyá
kuyakuywan qawariykuwayku.
4 Llapallan Kamachiq Tayta Dios,
yupaychasqayku Tayta Dios,
kay runaykikunapa mañakusqaykuwanqa
¿haykapikamataq rabianki qamqa?
5 Mikuypa rantinpim mikuniku weqellata.
6 Vecinoykutapas qanmi atipanachinki
ñakarichiwanankupaq.
Enemigoykutapas qanmi hatarichinki
burlakuwanankupaq.
7 Llapallan kamachiq Diosnillayku,
ñawpaq kasqaykuman hinayá
allinyaykachiwayku.
Salvasqa kanaykupaqyá
kuyakuywan qawariykuwayku.
8 Egipto nacionmantam
uvas plantata hinalla horqoykamuwarqankiku.
Mana reqsiqniyku nacionkunata
qarqoruspaykim chaypi plantawarqankiku.
9 Uvas plantapaq monteta kichachkaq hinam
plantawarqankiku.
Chaymi allin sapichasqa
chaypi takyarqaniku.
Hina chay allpapitaqmi
enteron allpata huntarqaniku.
10 Orqokunatapas uvas planta
llantuykuchkaq hinam mirarurqaniku.
Hatun cedro sachakunatapas kallmankunawan
tapaykuchkaq hinam chutarikurqaniku.
11 Lamar qochakamaraqmi
kallmankuna chayarurqa.
Eufrates Mayukamaraqmi
ikllisqankuna chayarurqa.
12 ¿Imanasqataq chay uvas huertapa
cerconta taqmaparachinki?
13 Saqeruptikim untiparun
monte kuchikunapas.
saqeruptikim dañokurun
purun animalkunapas.
14 Llapallan Kamachiq Diosnillayku,
qamqa kunanyá kutiriykamuwayku.
Hanaq pachamantayá qawariykamullawayku.
Uvas plantata hinayá qawariykamullawayku.
15 Ñoqaykumiki kaniku
chay uvas plantasqaykiqa.
Ñoqaykumiki kaniku
atiynikiwan ikllichisqaykiqa.
16 Chay uvas plantaqa kañasqam kachkan.
Chay uvas plantaqa kuchusqam kachkan.
Qaqchasqaykiraykum chaynaqa kachkan.
17 Reynikipaq akllasqayki
runatayá yanapaykuy.
Paypa miraynintayá
atiynikiwan yanapaykuy.
18 Hinaptinqa qanmantam
mana rakikusaqkuchu.
Qamtaña mañakunaykupaqyá
kawsachillawayku.
19 Llapallan Kamachiq Diosnillayku,
ñawpaq kasqaykuta hinayá
allinyaykachiwayku.
Salvasqa kanaykupaqyá
kuyakuywan qawariykuwayku.