Jerusalen llaqta tuñichisqa kaptin waqasqanku
Diosman Asafpa takisqan
79
Diosnilláy,
mana reqsiqniki runakunam
herenciayki allpaman yaykurunku.
Sapaqchakusqayki temploykitapas
millakuypaqtañam rurarunku.
Jerusalen llaqtatapas
pasaypaqtañam purmarachinku.
2 Serviqniki runakunapa ayantam
ullachkukunamanña mikunanpaq qoykunku.
Qanman sonqo runakunapa cuerpontam
purun animalkunamanña saqerunku.
3 Paykunapa yawarnintam
yakuta hinaña usurachinku.
Jerusalen llaqtapa muyuriqninpim
chaynata rurarunku.
Manam pipas karqachu
paykuna pampaykuqninku.
4 Vecinoykupas ñoqaykutam
insultawachkanku.
Muyuriqniykupi yachaqkunam
burlakuwachkanku.
5 Dios Taytalláy,
¿haykapikamataq qamqa piñakurunki?
¿Wiña-wiñaypaqchu qamqa piñakurunki?
¿Nina hinaraqchu qamqa ruparirunki?
6 Mana reqsisuqniki nacionkunamanyá
piñakuynikitaqa kachaykuy.
Mana mañakusuqniki gobiernokunamanyá
piñakuynikitaqa kachaykuy.
7 Jacob castakunatam tukurunku.
Yachasqanku llaqtakunatam purmarachinku.
8 Contraykupiqa amayá yuyariychu
abueloykupa huchallikusqankumantaqa.
Sinchi llakisqa kasqaykuraykuyá
llakipayariykullawayku ñoqaykutaqa.
9 Salvaq Diosnillayku,
sutiki ancha reqsisqa kananpaqyá yanapaykuwayku.
Salvaq Diosnillayku,
sutikiraykuyá libraspa pampachaykullawayku.
10 ¿Imanasqataq mana reqsiqniki
runakunaqa ninman?:
“¿Maypitaq kachkan Diosninkuqa?”
nispanku.
Serviqnikikunapa yawarninmanta
vengakusqaykitayá yachachunku.
Serviqnikikunapa yawarninmanta
vengakusqaykitayá qawaykusaqku.
11 Presokunapa quejantayá uyariy.
Hatun atiynikiwanyá salvaykariy.
Wañunanpaq kaqkunatayá kawsachiy.
12 Señorlláy,
vecinoykutayá
qanchiskama vengakuy.
Penqayman churasusqaykimantayá
qamqa vengakuy.
13 Chayna kaptinqa kay runaykikunam
graciasta qosqaykiku.
Kay michisqayki ovejaykikunam
wiñaypaq graciasta qosqaykiku.
Lliw mirayniykupim
wiñaypaqña alaballasqaykiku.