Runankunapa favorninpi Diospa rurasqanmanta
Yachachinapaq Asafpa takisqan
78
Runaykuna,
yachachikuyniyta uyariychik.
Qamkunaman nisqayta entiendeychik.
2 Rikchanachiykunawanmi rimarisaq.
Ñawpaq tiempokunamantaraq
watuchikunatam horqomusaq.
3 Uyarisqaykutawan yachasqaykutam
willasqaykichik.
Abueloykupa willawasqankutam
willasqaykichik.
4 Mirayniykumanpas mana pakaspam willasaqku.
Alabanapaq Tayta Diospa
rurasqankunamantam willasaqku.
Atiyninwan admirakuypaq milagro
rurasqankunamantam alabasaqku.
5 Jacobpa castankunamanmi
Chunkantin Kamachikuyninta qorqa.
Israelpa castankunamanmi
kikinpa yachachikuyninta churarqa.
Mirayninkunaman yachachinanpaqmi
abuelonchikkunaman kamachirqa
6 chaynapi hamuq miraykuna yachanankupaq,
churi-wawa naceqkunapas yachanankupaq
chaynataq paykunapas mirayninkuman willanankupaq.
7 Chaynapim Diospi confianzankuta churanqaku.
Rurasqanmanta mana qonqaspam kasukunqaku.
Paypa kamachikuyninkunatam kasukunqaku.
8 Manam abuelonkuna hinañachu kanqaku.
Abuelonkuqa rumi sonqo runakunam karqaku.
Mana kasukuq runakunam paykunaqa karqa.
Diosninkupipas mana confiakuqkunam karqa.
9 Efrainpa mirayninkunam
flechana armayoq karqaku
ichaqa guerraman yaykuspankum
qepaman kutirurqaku.
10 Diospa contratontam
mana kasukurqakuchu.
Yachachikuyninman hinaqa
manam kawsarqakuchu.
11 Qonqarurqakum Diospa rurasqankunamanta.
Admirakuypaq kaqkunata qawachisqanmanta.
12 Diosmi admirakuypaq milagrokunata
rurarqa abuelonkupa qayllanpi.
Chaykunatam rurarqa
Egipto nacion Zoan sutiyoq lawpi.
13 Lamar qochatam rakirqa
chayninta pasachinanpaq.
Yakutam sayarachirqa
perqa hina kananpaq.
14 Punchawmi pusarqa puyuwan,
tukuylla tutañataq ninawan.
15 Purunpi qaqakunatam
iskayman chitqarachirqa.
Uku-ukupi kaq yakutam
achkanpi tomaykachirqa.
16 Qaqamantam pawachimurqa
lloqlla hina yakukunata
hinaspam puririchirqa
achkallaña mayukunata.
17 Chaywanpas runakunaqa sapa kutillam
huchallikurqaku Diospa contranpi.
Chunniqpim hatarirurqaku
alto-altopi kaqpa contranpi.
18 Sonqonkupim Diosta piñachirqaku.
Munasqallanku mikuytam mañakurqaku.
19 Diospa contranpim ninakurqaku kaynata:
“¿Chunniqpipas churamunmanchu mikuyta?
20 Qaqata waqtachiptinmi
yakukuna pawaramurqa.
Mayu hinam chay yakuqa
lloqllaypaq-lloqllaramurqa.
¿Ichaqa mikuytapas qowachwanchu?
¿Runakunamanqa aychatapas qoykunmanchu?”
21 Chayna nisqankuwanmi
Tayta Dios piñakururqa.
Jacob castapa contranpim
nina ruparirurqa.
Israel castapa contranpim
payqa rabiarurqa.
22 Chaynaqa pasakurqa Diosninkupi
mana confiakusqankuraykum.
Chaynaqa pasakurqa yanapakuyninpi
mana creesqankuraykum.
23 Chaywanpas Diosqa puyukunatam kamachirqa.
Cielokunapa punkunkunatam kicharirqa.
24 Runankunapaqmi mikuyta parachimurqa.
Mikunankupaqmi trigota hina qomurqa.
25 Angelkunapa mikunantam runa mikurqa.
Saksanankukama mikunankupaqmi Dios qomurqa.
26 Cielomantam wayrachimurqa
intipa qespimunan lawmanta.
Atiyninwanmi pukuchimurqa
surlaw wayrata.
27 Paykunapaqmi polvota hinaña
parachimurqa aychata.
Lamar qochapi aqota hinañam
parachimurqa yututa.
28 Tiyachimurqam campamentonkupa chawpinman.
Tiyachimurqam karpankupa muyuriqninman.
29 Saksanankukamam mikurqaku mikuyta.
Diosmi cumplichirqa munasqankuta.
30 Munasqankupas manaraq tukuruchkaptinmi,
mikusqankupas siminkupiraq kachkaptinmi
31 paykunaman Diospa piñakuynin hamururqa.
Kallpasapa runakunatam wañurachirqa.
Israel casta mozokunatam chinkarachirqa.
32 Chaywanpas kasqallanmi huchallikurqaku
admirakuypaq rurasqankunapi mana creespanku.
33 Waspiyta hinallam paykunata chinkarachirqa.
Mancharikuypaqtam wañurachirqa.
34 Diosmi wañurachirqa paykunamanta kaqta.
Chaymi kawsaqkuna maskapayaqku payta.
Payman kutirikuspam maskaqku mana tukuyta.
35 Yuyarirqakum amparaqninkuqqa
Dioslla kasqanmanta.
Yuyarirqakum salvaqninkuqqa
alto-altopi kaq Dioslla kasqanmanta.
36 Siminkuwanmi engañaqku.
Rimaspam llullakuqku.
37 Diostaqa manam kuyarqaku
cheqap sonqowanchu.
Nitaqmi contratontapas
kasukurqakuchu.
38 Chaywanpas Diosqa kuyapayarqam paykunata.
Payqa pampachaykurqam mana allin rurasqankuta.
Manam chinkarachirqachu paykunataqa.
Achka kutitam asurichirqa piñakuynintaqa.
39 Diosmi yuyarirqa paykunaqa
wañuq runalla kasqankuta.
Yuyarirqam pasaruspan
chinkaruq wayra hinalla kasqankuta.
40 Achka kutipim Diosta
mana kasukurqakuchu chunniqpi.
Llakichirqakum payta
mana imapa kasqan purunpi.
41 Kasqallanmi Diosninkuta piñachirqaku.
Israelpa chuya Diosnintam llakichirqaku.
42 Manam yuyarirqakuchu Diospa atiyninmanta,
ñakarisqanku punchawpi rurasqanmanta.
43 Manataqmi yuyarirqakuchu
Egipto nacionpi milagrokuna rurasqanmantapas.
Manataqmi yuyarirqakuchu
Zoan lawpi admirakuypaq rurasqanmantapas.
44 Mayupi yakukunatam yawarman tikrarurqa.
Kallpaq yakukunatam yawarman tikrarurqa.
Mana tomanankupaqmi chaynata rurarurqa.
45 Kachupananpaqmi kachamurqa
nana-nanaq tankaylluta.
Tukurunanpaqmi kachamurqa
achka-achka kayrakunata.
46 Chakrankupi kawsayninkutam
urukunawan tukurachirqa.
Llamkasqankupa ruruntam
aqarwaywan mikurachirqa.
47 Uvasninkutam tukurachirqa
runtu parawan.
Purun higoskunatam tukurachirqa
chikchi parawan.
48 Animalninkutam wañurachirqa
runtu parawan.
Ganadonkutam wañurachirqa
rayokunawan.
49 Paykunapaqmi llumpayllataña piñakururqa.
Sinchillataña rabiaruspanmi
enemigonkunawan castigarqa.
50 Piñakuyninta manaña aguantaspanmi
peste onqoywan wañurachirqa.
Wañuchinanpaq manaña harkakuspanmi
peste onqoywan wañurachirqa.
51 Llapallan piwi churikunatam
Egipto nacionpi wañurachirqa.
Cam castakunapa yachasqanpim
paykunataqa wañurachirqa.
52 Runankunatam lloqsichimurqa
ovejakunata hina.
Chunniqnintam pusamurqa
ganadokunata hina.
53 Mana manchakunankupaqmi
confianzayoqta pusarqa.
Enemigonkutam ichaqa
lamar qocha pamparurqa.
54 Runankunatam pusamurqa
sapaqchasqan allpaman.
Runankunatam yaykuchimurqa
vencespa qechusqan orqokunaman.
55 Mana yupaychaqnin runakunatam qarqorqa.
Allpankutapas runankunamanñam suerteaspa partirqa.
Israel ayllukunatam yachanankupi kawsachirqa.
56 Ichaqa alto-altopi Diosta piñachispam
paypa contranpi hoqarikurqaku.
Chunkantin Kamachikuyninkunatam
paykunaqa mana kasukurqakuchu.
57 Abuelonkuna hinamá qepanchakuruspa
Diosninkuta traicionarurqaku.
Flechaqllanman flecharuq arco hinamá
Diosninkuta traicionarurqaku.
58 Moqopi kaq capillankupi
adoraspankum piñachirqaku.
Mamacha-taytachankuwanmi paykunaqa
sientechirqaku.
59 Chaykunata adorasqankuraykum
ancha-anchata rabiarurqa.
Israel casta runakunatam
pasaypaqta negarurqa.
60 Silo llaqtapi yachanan karpantapas
payqa saqerurqam.
Runakunawan yachanan karpantapas
payqa saqerurqam.
61 Enemigonkunamanmi entregaykurqa
atiynin reqsichiq baulta.
Enemigonkunamanmi entregaykurqa
sumaq kaynin reqsichiq baulninta.
62 Runankunapaqmi anchallataña rabiarurqa.
Guerrakunawanmi paykunata wañurachirqa.
63 Paykunamanta mozokunam
kañasqa wañurullarqaku.
Doncellakunapas casamientopaqmi
manaña takillarqakuchu.
64 Guerrakunapim wañururqa sacerdotenkupas.
Manataqmi waqarqachu viudankupas.
65 Puñusqanmanta rikcharichkaq hinam
Tayta Diosñataq rikcharirurqa.
Sinkasqanmanta rikcharichkaq hinam
Tayta Diosñataq rikcharirurqa.
66 Vencerurqam enemigonkunata.
Wiñaypaqmi penqakuypaqta
rurarurqa paykunata.
67 Negarurqam Joseypa mirayninta.
Manam akllarqachu Efrainpa castanta.
68 Juda ayllutam payqa akllarqa.
Kuyasqan Sion Moqotam akllarqa.
69 Hatu-hatun orqota hinam
santuariontapas rurachirqa.
Kay pachata takyachisqanta hinam
wiñaypaq takyachirqa.
70 Serviqnin Davidtam payqa akllarqa.
Oveja michisqanmantam paytaqa horqomurqa.
71 Oveja michisqanmantam paytaqa pusamurqa.
Jacob casta runankunata michinanpaqmi pusamurqa.
Israel casta runankunata michinanpaqmi pusamurqa.
72 Chaymi Davidqa michirqa cheqap sonqowan.
Chaymi Davidqa michirqa ancha yuyaywan.