Diospa rurasqankuna yuyarinamanta
Takiqkunapa maestronpaq, Diosman Asafpa takisqanta Jedutunpa allichasqan
77
Diosmanmi uyariwananpaq qaparini.
Payllatam uyariwananpaq qayakuni.
2 Llakikusqay punchawpim
Señorllata maskani.
Mana pisipaspam tutankunapas
makillayta haywarini.
Runakunapa consuelawasqantapas
mana munaspaymi wischupakuni.
3 Diosmanta yuyarispaymi hikikyani.
Yuyaymanaspaymi hukmanyaruni.
(Samariy)
4 Diosnilláy,
qamqa
manam puñuchiwankichu.
Muspaypi hina kaspaymi
mana rimaytapas atinichu.
5 Pasaq punchawkunamantam yuyarini.
Ñawpaq watakunamantam yuyarini.
6 Tutankuna takisqaytam yuyarini.
Sonqoypi yuyaymanaspaymi
kikiyta tapukuni:
7 “Señorqa ¿wiñaypaqchu wischuruwasunchik?
Señorqa ¿manañachu favorecewasunchik?
8 ¿Wiñaypaqchu kuyakuyninqa tanirun?
¿Wiñaypaqchu prometekusqanqa tukurun?
9 ¿Diosqa qonqarunchu kuyapayakuyninta?
¿Piñakuspachu qonqarun llakipayakuyninta?”
(Samariy)
10 Piensaspaymi kaynata nirqani:
“Onqosqa hinam kachkani” nispa.
“Alto-altopi Diospa atiyninqa
manam ñawpaq hinañachu kachkan” nispa.
11 Dios Taytalláy,
rurasqaykimantam yuyarillasaq.
Ñawpa tiempopi rurasqaykimantam yuyarillasaq.
Admirakuypaq rurasqaykimantam yuyarillasaq.
12 Qampa tukuy rurasqaykimantam rimallasaq.
Atiynikiwan rurasqaykimantam yuyaymanasaq.
13 Diosnilláy,
rurasqaykipiqa ancha chuyam kanki.
Qamllam munayniyoq Diosqa kanki.
14 Diosnilláy,
qamllam admirakuypaq milagrota ruranki.
Qamqa atiynikitam runakunaman reqsichinki.
15 Atiynikiwanmi runaykikunata reclamarqanki.
Jacobpa castankunatam reclamarqanki.
Joseypa castankunatam reclamarqanki.
(Samariy)
16 Diosnilláy,
lamar qocham rikurusurqanki.
Lamar qocham rikurususpayki
manchakuymanta anchata aywikacharqa.
Lamar qochapa ukunkunam katkatatarurqa.
17 Yana puyukunam loco parata chayachimurqa.
Paykunam nisyu rayokunata toqyachimurqa.
Llipyachimusqaykim tukuy hinastinman chayamurqa.
18 Muyuq wayrapim rayoykikuna toqyarqa.
Llipyaykikunam kay pachata kancharirqa.
Allpam kuyurispan katkatatarqa.
19 Lamar qochantam pasarqanki.
Achka yakuntam chimparqanki.
Yupikikunapas mana tariytam chimparqanki.
20 Runaykikunatam pusarqanki.
Ovejakunata hinam qatirqanki.
Moisespiwan Aaronwanmi
qamqa pusachirqanki.