Venceq Diosmanta
Takiqkunapa maestronpaq, cuerdayoq tocanakunawan Diosman Asafpa takisqan
76
Juda nacionpim
Diosqa reqsisqa.
Israel nacionpipas
sutinmi hatunchasqa.
2 Paypa karpanqa kachkan
Salem llaqtapim.
Paypa yachananqa kachkan
Sion llaqtapim.
3 Chaypim payqa pakiparurqa
nina puntayoq flechakunata.
Chaypim payqa pakiparurqa
harkachikunatawan espadakunata.
Chaypim payqa pakiparurqa
guerrapaq llapallan armakunata.
(Samariy)
4 Diosnilláy,
kancharichkaqmi qamqa kanki.
Achka animalpa kanan orqomantapas
aswan sumaqraqmi qamqa kanki.
5 Valeroso runakunam
imankupas qechusqa karqaku.
Mana rikcharinankupaqñam
paykunaqa puñururqaku.
Kallpasapa runakunapas
manam ima rurayta atirqakuchu.
6 Jacobpa yupaychasqan Diosnilláy,
amenazaykuptikim carretankupas
mana kuyuriqña rikurirun.
Paykunapa caballonkunapas
mana kuyuriqñam rikurirun.
7 Manchakuypaqmi kanki qamqa.
Llumpayta piñakuruptikiqa
¿pitaq sayanman ñawpaqnikipiqa?
8 Qamqa juzganaykipaqmi
reqsichikamunki hanaq pachamanta.
Kay pachaqa qasillallam
kachkan manchakuymanta.
9 Diosnilláy,
chaykunam pasakurqa
kay pachapi kaqkunata
juzganaykipaq hatarimuptiki.
Chaykunam pasakurqa
llapallan ñakariqkunata
salvanaykipaq hatarimuptiki.
(Samariy)
10 Runakunapa piñakusqanmi
qamtaña alabasunki.
Paykunapa piñakuynin puchuqwanmi
qamqa guerrapaq alistakunki.
11 Yupaychasqanchik Tayta Diosmanyá
qankunaqa prometekuychik.
Yupaychasqanchik Tayta Diosmanyá
qamkunaqa pagapuychik.
Paypa muyuriqninpi kaqkunayá
ofrendaykichikta apamuychik.
Respetanapaq kaqmanyá
ofrendaykichikta apamuychik.
12 Kamachikuqkunatam
payqa wañurachin.
Kay pachapi reykunatam
manchakuymanta katkatatachin.