Allin arreglo ruraq Diosmanta
Takiqkunapa maestronpaq, “Ama qonqaychu” niq tonopi Asafpa takisqan
75
Diosnillayku,
qanmanmi graciasta qomuykiku.
Hichpaykupi kasqaykiraykum
graciasta qomuykiku.
Milagroykikunamantam
runakuna willakunku.
2 Qamqa kaynatam ninki:
“Akllasqay tiempopim
allin arreglota rurasaq.
3 Kay pacha kuyuptinqa
tiyananmantam takyachisaq.
Tukuy imantin kuyuptinqa
ñoqam takyachisaq.
(Samariy)
4 Alabakuqkunatam nini:
‘Ama alabakuychikchu’ nispa.
Mana allin ruraqkunatam nini:
‘Ama hatunchakuychikchu’ nispa.
5 Paykunatam ninitaq:
‘Amayá llumpaytaqa
hatunchakuychikchu’ nispa.
‘Amataqyá qari-qariqa
rimaychikchu’ nispa.”
6 Pitapas hatunchaqqa manam hamun
intipa qespimusqanmantachu.
Pitapas hatunchaqqa manam hamun
intipa seqaykunanmantachu.
Manataqmi chayqa hamun
surlaw chunniqmantachu.
7 Diosllamiki kachkan juezqa.
Payllam wakin runata humillaqqa.
Payllam wakin runata hatunchaqqa.
8 Piñakuynin vasotam
Tayta Diosqa hapichkan.
Chay vinoqa
poqosqam kachkan.
Imakunawanpas chaqrusqam
chay vinoqa kachkan.
Chay piñakuynin vinota
Dios tallimuptinqa
kay pachapi
mana allin ruraqkunam tomanqa.
Paykunaqa tukunankukamam
llapallanku tomanqa.
9 Ñoqam ichaqa chay pasakuqmanta
wiñaypaq willakusaq.
Jacobpa Diosninmanmi
takispay alabasaq.
10 Diosmi nin kaynata:
“Mana allin ruraq runakunapa
atiynintam yanqachasaq” nispa.
“Allin ruraq runakunapa
atiynintañataqmi hatunchasaq” nispa.