Runakunata librananpaq Diosta mañakusqanmanta.
Yachachinapaq Asafpa takisqan
74
Diosnilláy,
¿imanasqataq wiñaypaqqa
wischuruwankiku ñoqaykutaqa?
¿Imanasqataq piñakurunki
kanchaykipi ovejaykikunapa contranpiqa?
2 Ñawpaq tiempokunamantaraq
rantisqayki runaykikunamantayá yuyariy.
Ñawpaq tiempokunamantaraq
herencia hina reclamasqayki
ayllu runakunamantayá yuyariy.
Ñawpaq tiempomantaraq
yachasqayki kay Sion Moqomantayá yuyariy.
3 Hamuspayá qaway
wiñaypaq purmachisqa kay llaqtata.
Hamuspayá qaway
enemigopa tuñichisqan kay santuariota.
4 Qampa enemigoykikunam
huñuwasqaykiku wasipi qaparkachanku.
Paykunaqa chaypim señalpaq
banderankutapas sayarachinku.
5 Paykunaqa rikchakunku
hoqarispan hacha apamuq runamanmi.
Paykunaqa rikchakunku
sacha-sacha ukupi kuchuq runamanmi.
6 Paykunaqa hachawanmi pakiparunku
sumaqllaña llaqllasqa kaqkunata.
Paykunaqa machetewanmi pakiparunku
sumaqllaña llaqllasqa kaqkunata.
7 Santuarioykitam
paykunaqa kañarunku.
Yachanayki sitiotam
tuñirachispa yanqacharunku.
8 “Paykunatayá pasaypaqta chinkarachisun”
nispam tanteanakurunku.
Kay nacionpi qanwan huñunakunayku
lliw wasikunatam paykunaqa kañarunku.
9 Manam rikunikuñachu
qanmanta yachachikuq ima señaltapas.
Manamriki kanñachu
qanmanta willakuq runapas.
Manamriki kanñachu
haykapim kaykuna pasanan yachaqpas.
10 Diosnilláy,
¿haykapikamataq enemigoqa
insultasunki?
Diosnilláy,
¿sutikitapas wiñaypaqchum
qepanchakusunki?
11 ¿Imanasqataq manaqa haywarimunkichu
atiyniyoq makikitaqa?
Makikita horqoykuspayá
puchukarachiy paykunataqa.
12 Diosnilláy,
ñawpaq tiempomantaraqmi
reyniyqa kanki.
Kay pachapi pitapas salvaykuqqa
qamllam kanki.
13 Qamqa atiynikiwanmi
lamar qochata rakirurqanki.
Yakupi kaq manchakuypaq
animalkunapa umantam pakiparqanki.
14 Manchakuypaq Leviatan sutiyoq
animalpa umantam ñutururqanki.
Chaypa aychantam
chunniqpi yachaqkunaman qoykurqanki.
15 Qamqa pukyukunatam toqyachirqanki.
Qamqa mayukunatam pawachirqanki.
Mana chakiq yakutam chakichirqanki.
16 Qampam tutapas-punchawpas.
Qanmi takyachirqanki killatapas.
Qanmi takyachirqanki intitapas.
17 Kay pachapa linderonkunatam
qamqa churarqanki.
Qanmi poqoy tiempotapas
qallarichirqanki.
Qanmi chiraw tiempotapas
qallarichirqanki.
18 Dios Taytalláy,
yuyariyá enemigopa insultasusqaykita.
Yuyariyá sutillaykitaqa
mana umayoq runakuna wischupakusqanta.
19 Kay runaykikunataqa
kullkuchakunata hinaqa
amayá qoykuwaykuchu
purun animalkunamanqa.
Amayá wiñaypaqqa qonqaruwaykuchu
kay ñakariq runaykikunataqa.
20 Amayá qonqaruychu contratotaqa.
Tutayaq kuchupi daño ruraqkunaqa
huntarachinkuñam kay pachataqa.
21 Amayá humillachikuchunchu
ñakariq runaqa.
Qamtam alabasunki
ñakariq runaqa.
Qamtam alabasunki
wakcha runaqa.
22 Diosnilláy,
hatarispayá defiendey asuntoykita.
Yuyariyá mana umayoq runakunaqa
tukuy tiempo kamisusqaykita.
23 Amayá qonqaruychu
enemigoykikunapa qayaykachakusqantaqa
chaynataq manaña tukuyta
contraykipi hatariqkunapa qaparisqantaqa.