KIMSA KAQ LIBRO (73-89)
Diospa kuyapayakuyninmanta
Diosman Asafpa takisqan
73
¡Diosqa mayna allinpunim
Israel runakunapaqqa!
¡Diosqa mayna allinpunim
limpiolla sonqokunapaqqa!
2 Wikapakuq hinaraqmi
yaqalla wichiykullarqani.
Kuchpakuchkaq hinaraqmi
yaqalla urmaykullarqani.
3 Alabakuqkunamantam
ñoqaqa envidiakurqani.
Mana allin ruraqkuna
apuyasqantam qawarqani.
4 Paykunaqa manapunim
ñakarinkuchu wañuspapas.
Paykunaqa wiray-wiray
kallpasapamya kachkankupas.
5 Manam ñakarinkupaschu
wakillankuna hinaraqqa.
Manam sasachakunkuchu
wakillankuna hinaraqqa.
6 Wallqakusqankuta hinam
orgullonkuta qawachinku.
Pachakuchkaq hinallamya
dañokunata ruraykunku.
7 Wirayarusqankuraykum
pawaruchkanña ñawinkupas.
Mana tukurisparaqmi
hukmanllataña piensankupas.
8 Paykunaqa burlakuspam
hukman piensaywan rimakunku.
Hatunchakuspankuraqmi
ñakariymanta rimarunku.
9 Rimarunkum paykunaqa
hanaq pachapa contranpipas.
Rimarunkum kay pacha
dueñochakuykunankupaqpas.
10 Chaymi runankunatapas
Diospuni kutirichimunqa.
Saksaykuytam yakutapas
paykunallapaq horqochinqa.
11 Ninkutaqmi paykunaqa:
“¿Imaynataq yachanman Diosqa?
¿Yaqachum musyakunman
Alto-altopi kaq Diosqa?”
12 Kay mana allin runakunaqa
chaynatam ruranku.
Paykunaqa hawka-hawkaraqmi
aswan-aswan apuyakuchkanku.
13 Chaynaqa yanqapaqmi
limpiakuchkani sonqoytapas.
Chaynaqa yanqapaqmi
mana allinman
makiypa mana chapukusqanpas.
14 Ñoqaqa tukuy punchawmi
azotesqa karqani.
Ñoqaqa sapa madrugawmi
castigasqa karqani.
15 Sichum chaynata nispay
rimayman karqa hinaspaqa
kay churikunapa miraynintaqa
ñachá traicionaruymanña karqa.
16 Kay asuntomanta tanteaspam
munarqani entiendenaypaq.
Ichaqa llumpay sasam karqa
chaykuna entiendenaypaq.
17 Diospa santuarionman yaykuspañam
chayraq entienderqani.
Paykunataqa imam pasananmantam
sumaqta entienderqani.
18 Lluchka-lluchka ñanmanmi
paykunataqa churaykunki.
Purmaq wasita hinam
paykunataqa rurarunki.
19 Qonqaymanta purmachisqam
paykunaqa rikurirunku.
Manchakuywan tukusqam
paykunaqa rikurirunku.
20 Señorlláy,
puñuymanta rikcharichkaq hinam
qamqa hatarinki.
Paykunaqa hawa sonqo kasqankutam
qamqa desprecianki.
21 Sonqollay llakisqa kaptinmi
ñoqaqa rikurirurqani
mana entiendeq animal hinaña.
22 Sonqollay nanaywan kaptinmi
qampa qayllaykipiqa rikurirurqani
asno hinaña.
23 Ichaqa chaywanpas
ñoqawanraqmi kachkanki.
Ichaqa chaywanpas
alleq makiymantam hapiwachkanki.
24 Allinta consejawaspaykim
qamqa pusawachkanki.
Allin reqsisqatañam
qamqa chaskiykuwanki.
25 Qamllam kapuwachkanki
hanaq pachapiqa.
Qanwan kaspayqa manam munanichu
imatapas kay pachapiqa.
26 Cuerpollaymi sonqollaywan
llumpayta wañunayachkan.
Ichaqa Diosnillaymi
rumita hina takyachiwachkan.
Ichaqa Diosnillaymi
herencia hina wiñaypaq kapuwachkan.
27 Qanmanta karunchakuqkunaqa
pasaypaqtam puchukanqaku.
Qanmanta rakikuqkunaqa
qampa tukurusqaykim kanqaku.
28 Ñoqapaqqa ¡mayna sumaqmi
Diospa ñawpaqninpi kayqa!
Señor Diosnillaypim
amparakuni ñoqallayqa.
Paypa tukuy rurasqanmantam
willakusaq ñoqallayqa.