Reypaq mañakuymanta
Salomonpa takisqan
72
Diosnilláy,
reymanyá yachaynikita qoykuy
allin arreglokuna rurananpaq.
Diosnilláy,
reypa churintayá yanapaykuy
allin kaqkuna rurananpaq
2 chaynapi qampa allin rurasqaykiman hina
paypas runaykikuna juzgananpaq,
chaynapi allin arreglo rurasqaykiman hina
wakchakunata paypas juzgananpaq.
3 Chaynapim orqokunapas
hawka kawsakuytaña apamunqa.
Chaynapim moqokunapas
allin ruraytaña apamunqa.
4 Reyqa ñakariqkunapaqyá
allin arreglota rurachun.
Wakchakunapa churinkunatayá
reyqa salvachun.
Runakuna ñakarichiqtayá
reyqa sarupachun.
5 Inti kanankamaqa
runakunam respetasunki.
Killa kanankamaqa
wiñaypaqmi respetasunki.
6 Ikllirimuq rutusqa
pastokunapa hawanman
paramuchkaq hinayá
reyqa kachun.
Allpapa hawanman
paramuchkaq hinayá
payqa kachun.
7 Paypa gobiernasqan tiempopiqa
iklliriq pasto hinayá
rikurichun allin kawsakuyqa.
Ruruq plantakuna hinayá
killa kanankamaqa achkallataña
mirachun hawka kawsakuyqa.
8 Lamar qochamanta qallaykuspayá
reyqa gobiernachun.
Eufrates Mayumanta qallaykuspayá
payqa gobiernachun
kay pachapa cantonkama.
9 Chunniqpi yachaqkunam
paypa ñawpaqninpi qonqorakunqaku.
Ñutu allpa mikunankukamam
enemigonkunaqa humillakunqaku.
10 Tarsis lawmantam
reykuna apamunqaku regalokunata.
Lamar qochapa patankunamantam
apamunqaku regalokunata.
Saba lawmantam
reykuna apamunqa presentekunata.
11 Llapachallan reykunam
paypa ñawpaqninpi pakchakunqaku.
Llapachallan nacionkunam
payta servinqaku.
12 Payqa libraykunqam
qayakuq wakcha runataqa.
Payqa libraykunqam
mana yanapasqa runataqa.
13 Payqa llakipayanqam
mana kallpayoq runataqa.
Payqa llakipayanqam
mana imayoq runataqa.
Payqa salvaykunqam
wakchakunapa vidantaqa.
14 Engañasqa kanankumantam
payqa wakchakunata libraykunqa.
Dañasqa kanankumantam
payqa wakchakunata libraykunqa.
Reypa llumpay kuyasqanmi
paykunapa vidanqa.
15 ¡Kawsachunyá reyqa!
Saba lawpi kaq qoritayá
paymanqa qochunku.
Paypaqqa siempreyá
Diosta mañakuchunku.
Dios bendecinanpaqyá
paypaq mañakuchunku.
16 Kay pachapiyá
achka-achka kawsaykuna qespichun.
Moqo chakrakunapiyá
sumaqllataña kawsaykuna aywityachun.
Libano lawpi hinayá
kawsaykunaqa sumaqllataña ruruchun.
Llaqtapi yachaqkunapas
plantakuna hinayá sumaqllataña waytarichun.
17 Reypa sutinqa wiñaypaqyá
yuyasqa kachun.
Paypa reqsisqa kayninqa
inti hinayá takyachun.
Payraykuyá llapallan nacionkunaqa
bendecisqa kachun.
Paytaqa llapa nacionkunayá
kusikuyniyoqpaq hapichun.
18 Alabasqayá kachun
Israelpa yupaychasqan Tayta Diosqa.
Payllam ruran milagrokunataqa.
19 Paypa allin reqsisqa sutinqa
wiñaypaq alabasqayá kachun.
Tukuy kay pachapiyá
payqa ancha reqsisqa kachun.
¡Chaynapuniyá kachun!
20 Kaypim tukun Davidpa mañakusqankuna,
payqa karqa Isaipa churinmi.