Yuyaq runapa mañakusqan
71
Dios Taytalláy,
qamllapim amparakurqani ñoqallayqa.
Amayá haykapipas
penqaypiqa kasaqchu ñoqallayqa.
2 Allin ruraynikiman hinayá
libraykullaway ñoqallaytaqa.
Allin ruraynikiman hinayá
lluptichillaway ñoqallaytaqa.
Uyariykuwaspaykiyá apurawman
salvaykullaway ñoqallaytaqa.
3 Machay hinayá qamqa kapullaway
chaypi yachakunaypaq
chaynapi ñoqallayqa chayman
sapa kuti yaykunaypaq.
Qamyá kamachikuy
ñoqallayqa salvasqa kanaypaq.
Hatun rumi hinam amparaykullawanki.
Pakakuna wasi hinam pakaykullawanki.
4 Diosnilláy,
mana allin ruraqkunamantayá
libraykullaway.
Liso runakunamantayá
libraykullaway.
Daño ruraqkunamantayá
libraykullaway.
5 Señor Diosnilláy,
qamllam kanki
warma kasqaymanta
ñoqapa suyanayqa.
Qamllam kanki
warma kasqaymanta
ñoqapa confiakunayqa.
6 Nacesqaymantapunim
qampi hapipakurqani ñoqallayqa.
Mamaymanta nacenaypaqqa
qanmi yanapawarqanki ñoqallaytaqa.
Qamtam tukuy tiempo
alaballasqayki ñoqallayqa.
7 Milagro hinam karqani
achka runakunapaq ñoqallayqa.
Ichaqa qamllam kanki
ñoqapa amparakunayqa.
8 Alabanapaq kasqaykimantam
tukuy punchaw rimallachkani.
Suma-sumaq kasqaykimantam
tukuy punchaw rimallachkani.
9 Ñoqallay machuyaruptiyqa
amayá wischurullawaychu.
Kallpallay tukuruptinqa
amayá saqerullawaychu.
10 Ñoqapa enemigoykunam
contraypi rimakuwanku.
Wañuchiwananpaq wateqaqniykunam
huklla rimanakurunku.
11 Paykunam ninakunku kaynata:
“Diosqa karunchakurunñam paymanta.
Qatispayá hapiruychikña paytaqa.
Manam pipas libranqañachu paytaqa.”
12 Diosnilláy,
amapuniyá
karunchakuychu ñoqamantaqa.
Diosnilláy,
utqamuspayá
yanapaykuway ñoqallaytaqa.
13 Ñoqapa enemigoykunaqa
penqayman churasqayá kachunku.
Ñoqapa enemigoykunaqa
chinkachisqayá kachunku.
Mana allinniy munaqkunaqa
penqaypiyá kachunku.
Mana allinniy munaqkunaqa
pantaypiyá kachunku.
14 Ñoqallaymi ichaqa
tukuy tiempo suyallasqayki.
Ñoqallaymi ichaqa
aswan-aswan alabasqayki.
15 Tukuy punchawmi rimallasaq
allinlla ruraq kasqaykimanta.
Tukuy punchawmi rimallasaq
ñoqallay salvaykuwasqaykimanta.
Chaykuna mana entiendey atina kaptinpas
rimallasaqmi chaykunamanta.
16 Señor Diosnilláy,
rimarisaqmi atiywan rurasqaykimanta.
Yuyarichisaqmi allin rurasqaykimanta.
17 Diosnilláy,
qanmi warma kasqaymanta
qawachiwarqanki milagroykikunata.
Kunankamapas willakuchkaniraqmi
qampa milagroykikunata.
18 Diosnilláy,
yuyaqña kaptiyqa
amayá qonqarullawaychu.
Diosnilláy,
soqo umaña kaptiyqa
amayá qonqarullawaychu.
Ñoqaqa munachkaniraqmi
qepa wiñaymanpas
atiyllaykimanta willayta.
Ñoqaqa munachkaniraqmi
qepa hamuqkunamanpas
kallpallaykimanta willayta.
19 Diosnilláy,
cielokunamanpas haypaq hinañam
kachkan allin kaqkuna rurasqaykiqa.
Hatu-hatunmi
qampa chaykuna rurasqaykiqa.
Manam pipas kanchu qam hinaqa.
20 Qanmi kachaykuwarqanki
llumpay ñakariykunaman.
Qanmi kachaykuwarqanki
llumpay mana allinkunaman
ichaqa chaywanpas huktawanmi
hatarichiwanki kawsayman.
Kay pachapi ukullay-uku uchkumantam
hoqarimuwanki huktawan.
21 Aswanraqmi qamqa hatunyachiwanki.
Huktawanmi qamqa consuelawanki.
22 Diosnilláy,
confiakuna kasqaykimantam
hatun arpawan graciasta qosqayki.
Israelpa yupaychasqan chuya Diosnilláy,
taksa arpawanmi qamta alabasqayki.
23 Kusikuywan qaparispaymi takipusqayki.
Libraykuwasqaykimantam takipusqayki.
24 Rimaspaymi tukuy punchaw willakusaq.
Allinlla ruraq kasqaykimantam willakusaq.
Chaynatam willakusaq
mana allinniy maskaqkunaqa
penqaypi kasqankurayku.
Chaynatam willakusaq
mana allinniy maskaqkunaqa
pantaypi kasqankurayku.