Llakikuypi qaparisqanmanta
Takiqkunapa maestronpaq, “Amanqaykuna” sutiyoq tonopi Davidpa takisqan
69
Diosnilláy,
salvaykullawayá
ñoqallaytaqa.
Yakum qeqeparachiwachkanña
ñoqallaytaqa.
2 Timpuq mitumanmi
ñoqallayqa wichillachkani.
Mana sayay atina mitumanmi
ñoqallayqa wichillachkani.
Ukullay-uku yakupa tapasqanmi
ñoqallayqa kallachkani.
Mayukunapa apasqanmi
ñoqallayqa kallachkani.
3 Qayaykachakuptiymi
kunkallaypas saqrayarunña.
Qayaykachakuptiymi
kunkallaypas chakirunña.
Diosnillayta suyasqaypim
ñawillaypas tutayarunña.
4 Yanqamanta cheqniqniykunam
chukchaymantapas masraq rikurirunku.
Yanqamanta tukuwaqniy munaqkunam
achkallataña mirarunku.
Mana suwakuchkaptiypas
paykunam kutichinayta munanku.
5 Diosnilláy,
yachankim loco hina ruraq kasqaytaqa.
Manam pakaykimanchu huchaykunataqa.
6 Llapallan Kamachiq
Señor Diosnilláy,
qampi confiakuqkunaqa
amayá penqaypiqa kachunkuchu.
Ñoqaraykuqa
amayá penqaypiqa kachunkuchu.
Israelpa yupaychasqan Diosnilláy,
munayllawanña maskasuqnikikunaqa
ñoqaraykuqa amayá penqaypiqa kachunkuchu.
7 Qamraykum insultasqa karqani.
Qamraykum uyallaypipas pukayarqani.
8 Ñoqapa wawqeykunapapas
mana reqsinanmi karqani.
Mamaypa wawankunapapas
mana reqsinanmi karqani.
9 Sinchitam sientini
qampa wasikimantaqa.
Kamiqnikikunapa kamikuyninmi
ñoqaman wichiykuwarqa.
10 Ayunaspa waqaptiypas
insultawarqakum paykunaqa.
11 Lutokuptiypas watuchimanta hinam
rimakuwanku paykunaqa.
12 Llaqtapa punkunpi huñunakuqkunam
ñoqamanta wachachachachkanku.
Sinkakuq runakunam
ñoqamanta takispa qayaykachakunku.
13 Ichaqa Dios Taytalláy,
ñoqaqa qamllatam mañakullayki.
Diosnilláy,
akllakusqayki tiempopi
contestawanaykipaqmi mañakullayki.
Ancha kuyapayakuq kasqaykiraykuyá
contestaykullaway.
Salvawanaykipaq confiakuna kasqaykiraykuyá
contestaykullaway.
14 Mitupiqa ama chinkaykunaypaqyá
libraykullaway.
Ñoqallay cheqniqkunamantayá
libraykullaway.
Ukullay-uku yakumantayá
libraykullaway.
15 Amayá kachaykuwaychu
mayukuna apawananpaqqa.
Amayá kachaykuwaychu
ukullay-uku yaku
millpuruwananpaqqa.
Amayá kachaykuwaychu
ukullay-uku pozo
taparuwananpaqqa.
16 Dios Taytalláy,
allin kuyapayakuynikiman hinayá
contestaykullaway.
Llumpayllaña llakipayakuynikiman hinayá
qawariykullaway.
17 Kay serviqnikimantaqa amayá
uyallaykita pakaykuwaychu.
Sasachakuypi kasqayraykuyá
salvawanaykipaq ama unamuychu.
18 Ñoqallayman asuykamuwaspayá
reclamaykullaway.
Ñoqapa enemigoykunaraykuyá
qamqa libraykullaway.
19 Qamqa yachankim
insultawasqankuta.
Qamqa yachankim
penqayman churawasqankuta.
Qamqa yachankim
pikunam enemigoykuna kasqankuta.
20 Insultawaptinkum sonqollaypas
nanay-nanayña kachkan.
Chaynapim cuerpollaypas
mana kallpayoqña kachkan.
Consuelota munallaptiypas
manamya pipas llakipayawarqachu.
21 Ñoqapa mikunaypim venenota churarqaku.
Yakunayawaptinmi vinagreta tomachiwarqaku.
22 Paykunapa convidonqa
kikinkutayá wichiykachichun
huk toqlla hina.
Convidopi kaq compañeronkunapas
paykunapaqyá rikuriruchun
huk trampa hina.
23 Paykunapa ñawintayá tutayarachiy.
Chakintapas siempretaqyá katkatatachiy.
24 Paykunapa hawanmanyá
piñakuynikita wichiykarachiy.
Ruparichkaq hina piñakuynikiwanyá
paykunata hayparachiy.
25 Campamentonkupas
chunniruchunyá paykunapaqa.
Amañataqyá pipas yachachunchu
paykunapa karpanpiqa.
26 Pruebasqayki runatam
paykunaqa ñakarichinku.
Ñakarichisqaykipa nanayninmantam
paykunaqa willakachakunku.
27 Mana allin rurasqankutaqa
amayá qonqaruychu.
Qampa qosqayki allin kaqtaqa
amayá haypachunkuchu.
28 Wiñay kawsaqkunapa sutin
apuntana libromantapas chinkarachiyá
paykunapa sutintaqa.
Allin ruraq runakunapa sutin
apuntana libropiqa amayá apuntaychu
paykunapa sutintaqa.
29 Diosnilláy,
qamyá salvaykullaway
kay ñakariq runataqa.
Diosnilláy,
qamyá hoqariykullaway
kay nanaywan kaq runataqa.
30 Diospa sutintam
takispa alaballasaq.
Payman graciasta
qospaymi hatunchallasaq.
31 Chaynapim Tayta Diosqa
toro wañuchipunamantapas
aswan agradowanraq chaskinqa.
Chaynapim waqrayoq
hinaspa atakayoq malta toromantapas
aswan agradowanraq payqa chaskinqa.
32 Chayta qawaykuspam
kusikunqaku ñakariqkuna.
Sonqoykichikyá kallpanchakuchun
Dios maskaq runakuna.
33 Tayta Diosqa uyarinmi
wakcha runakunatapas.
Manam desprecianchu
preso runankunatapas.
34 Cielokunapas kay pachapas
Diostayá alabachun.
Lamar qochapas chaypi
tukuy imapas
Diostayá alabachun.
35 Diosmi salvanqa
Sion llaqtataqa.
Payqa huktawanmi hoqarinqa
Juda lawpi llaqtakunataqa.
Hinaptinmi chaypiña yachanqaku.
Hinaptinmi chayta dueñochakunqaku.
36 Diosta serviqkunapa mirayninmi
herenciapaq chaskinqaku.
Diospa sutin kuyaqkunam
chaypiqa yachanqaku.