Israel runakunapa vencesqanmanta
Takiqkunapa maestronpaq, Diosman Davidpa takisqan
68
Dios hatariptinqa enemigonkunam
lliw cheqerikunku.
Cheqniqninkunam qayllanmanta
lliw ayqerikunku.
2 Wayrapa apasqan qosni hinallam
paykunaqa waspirunqaku.
Ninaman wischusqa cera hinallam
paykunaqa chullurunqaku.
Chaynatapunim mana allin ruraqkunaqa
pasaypaq chinkarqaku.
3 Allin ruraqkunam
ichaqa kusikunqaku.
Diospa ñawpaqninpim
anchallataña kusikunqaku.
Llumpay kusikuymantam
paykunaqa qaparinqaku.
4 Diosmanyá takiychik.
Sutinmanyá takiychik.
Puyukunapi puriqtayá
qamkuna hatunchaychik.
Tayta Diosmi paypa sutinqa.
Paypa ñawpaqninpiyá
kusikuychik qamkunaqa.
5 Chuya yachananpi Diosqa
mana piyniyoqkunapa taytanmi.
Juiciopipas viudakuna defiendeqmi.
6 Diosmi mana piyniyoqkunaman
qoykun familiata.
Preso kaqkunatam kusikuchkaqta
horqomun carcelmanta.
Mana kasukuqkunamanmi ichaqa qoykun mana imapa wiñanan allpapi kawsakuyta.
7 Diosnilláy,
runaykunapa ñawpaqnintam
qamqa rirqanki.
Diosnilláy,
chunniqnintam qamqa
paykunata pusarqanki.
(Samariy)
8 Hinaptinmi kay pachapas katkatatarqa.
Parapas cielokunamantam paramurqa.
Sinai Orqopim Diospa ñawpaqninpi
kaykuna pasakurqa.
Israelpa yupaychasqan Diospa ñawpaqninpim
kaykuna pasakurqa.
9 Diosnilláy,
qamqa llumpayllatañam parachimurqanki.
Chakisqa allpaykitam nuyuykachirqanki.
10 Diosnilláy,
runaykikunatam yachananpaq
chaypi churarqanki.
Wakchakunata kuyapayaspam
qamqa mantienerqanki.
11 Señormi noticiata willakurqa,
chaytam achka warmikuna willakurqa:
12 “Llapa reykunam ayqekuchkanku.
Llapa tropankunam ayqekuchkanku.
Paykunamanta qechusqa kaqkunatam
warmikuna wasinkupi rakinakunku.
13 Chay rakinakusqankuqa karqa
palomapa rapran formayoq
qollqewan llusisqa raprakunam,
palomapa puran formayoq
qellullaña qoriwan
llusisqa purakunam.
¿Imanasqataq wakinnikichikqa
guerra kachkaptinqa
mana rirqankichikchu?
¿Imanasqataq ovejakunapa kanchanpi
pakakuruspaqa manaqa rirqankichikchu?”
14 Tukuy atipayniyoq Diosmi
cheqerachirqa llapa reykunata.
Salmon Orqopi lastachichkaq hinam
cheqerachirqa paykunata.
15 Mayna altollañam Basan Orqoqa.
Achka puntayoqmi Basan Orqoqa.
16 Achka puntayoq orqokuna
¿imanasqataq envidiawanqa qawankichik
Diospa yachay munasqan orqotaqa?
Tayta Diosqa chay orqopim
wiñaypaq kawsakunqa.
17 Waranqantin-waranqantinmi
guerrapaq Diospa carretankunaqa.
Señorqa Sinai Orqomantam
santuarionman hamurqa.
18 Dios Taytalláy,
altomanmi wicharirqanki.
Presokunatam aparikurqanki.
Runakunamantam regalokunata
qamqa chaskirqanki.
Paykunawan yachanaykipaqmi
mana kasukuqkunamantapas
regalokunata chaskirqanki.
19 Señortayá alabasunchik.
Payqa sapa punchawmi
qepillanchikta apaysiwanchik.
Diosninchik kasqanraykum
payqa salvaykuwanchik.
(Samariy)
20 Pitapas salvaykuq Diosqa
Diosnillanchikmi.
Pitapas wañuymanta libraykuqqa
Señor Diosnillanchikmi.
21 Diosmi pakiparunqa
enemigonkunapa umantaqa.
Diosmi llikiparunqa
enemigonkunapa uma qarantaqa.
22 Señormi nirqa kaynata:
“Ñoqam qamtaqa kutichimusqayki
Basan lawmanta.
Ñoqam qamtaqa kutichimusqayki
ukullay-uku lamar qochamanta.
23 Chaynapim qamqa
enemigoykikunapa yawarninpi
chakikikunatapas pukayachinki.
Chaynapim qamqa
enemigoykikunapa yawarnintapas
allqoykiwan laplachinki.”
24 Diosnilláy,
suyullaña riq runaykikunatam
paykunaqa qawachkankuña.
Reynilláy,
Diosnilláy,
santuarioykiman riq runaykikunatam
paykunaqa qawachkankuña.
25 Runakunapa ñawpaqnintam
takiqkuna richkanku,
takiqkunapa qepantam
tocaqkuna richkanku.
Chawpinkutañataqmi tinyata tocastin
doncellakuna richkanku.
26 Huñunasqa runakuna ukupiyá
Diosta alabaychik.
Israel runakunapa huñunakuyninpiyá
Tayta Diosta alabaychik.
27 Aslla kaspapas Benjamin runakunam
ñawpaqta richkan.
Qepankutañataqmi Juda jefekuna richkan.
Richkantaqmi Zabulon jefekunapas
chaynataq Neftaliy jefekunapas.
28 Diosnikim kamachirqa
qampa kallpaykita.
Diosnillayku,
ñawpaqpi rurasqaykiman hinayá
qawachiwayku kallpallaykita.
29 Jerusalenpi kaq palacioykimanmi
reykuna apamusunki regalokunata.
30 Soqosllaña ukupi animal hina
yachaqkunatayá qaqchay.
Uñantin torokuna kachkaq hina
achkallaña runakunatayá qaqchay.
Paykunam qollqerayku
sarupanku runakunata.
Qanmi cheqechirqanki
guerralla kuyaq runakunata.
31 Hatun kamachikuqkunam
Egipto nacionmanta hamurqaku.
Cus nacionniyoq runakunam
Diosman makinkuta hoqarinqaku.
32 Kay pachapi nacionkuna,
Diosmanyá takiychik.
Kay pachapi nacionkuna,
Señormanyá takiychik.
(Samariy)
33 Payqa carretapi purichkaq hinam
cielokunapi purin.
Payqa ñawpaq
tiempomantaraq kaq
cielokunapim purin.
Uyariychikyá paypa qayakusqanta.
Uyariychikyá nisyullay-nisyu vozninta.
34 Qamkunaqa reqsiychikyá
Diosqa atiyniyoq kasqanta.
Reqsiychikyá Israel runakunapi
hatunchasqa kasqanta.
Reqsiychikyá paypa atiyninqa
puyukunapipas kasqanta.
35 Diosnilláy
¡mayna manchakuypaqmi
kanki santuarioykipiqa!
Israel castapa Diosninqa
kallpanchanmi runankunataqa.
¡Alabasqayá kachun Diosqa!