Tayta Diosmi ñoqanchikwanqa kachkan
Takiqkunapa maestronpaq, “Alamot” sutiyoq tonopi Coreypa mirayninpa takisqan
46
Diosmi amparawaqninchikqa.
Diosmi kallpanchawaqninchikqa.
Diosmi sasachakuykunapi
chaylla yanapawaqninchikqa.
2 Chayraykum ñoqanchikqa
mana manchakusunchu.
Allpa tikrakuptinpas
manam manchakusunchu.
Lamar qochapa chawpinman
orqokuna wichiptinpas
manam manchakusunchu.
3 Lamar qochaqa qaparillawanña
timpuypaq-timpuptinpas
manam manchakusunchu.
Chaypa hoqarikusqanwan
orqokuna katkatataptinpas
manam manchakusunchu.
(Samariy)
4 Mayupa achkallaña yakunkunam
Diospa llaqtanta kusichin.
Kikinpaq sapaqchakusqan
llaqtantam kusichin.
5 Diosmi kachkan
chay llaqtapa chawpinpiqa.
Manapunim wichinqachu
chay llaqtaqa.
Achikyamuptinmi Diospuni
chay llaqtataqa yanapanqa.
6 Qaparinmi llapa nacionkunapas.
katkatatanmi llapa gobiernokunapas.
Dios qapariptinmi chullurun kay pachapas.
7 Ñoqanchikwanqa kachkan
Llapallan Kamachiq Tayta Diosmi.
Ñoqanchikta pakaykuwaqninchikqa
Jacobpa Diosninmi.
(Samariy)
8 Hamuspayá qawaychik
Tayta Diospa imam rurasqankunata.
Hamuspayá qawaychik
kay pachapi imam purmachisqankunata.
9 Guerrakunatam payqa tanirachin.
Kay pachapa cantonkamam tanirachin.
Flechana arcokunatam pakiparun.
Peleana lanzakunatam pakiparun.
Guerrapaq carretakunatam kañarun.
10 Diosmi nin kaynata:
“Amaña peleaspayá
yachaychik Dios kasqayta.
Yachaychikyá nacionkunapa hawanpiqa
ñoqa kasqayta.
Yachaychikyá kay pachapa hawanpiqa
ñoqa kasqayta.”
11 Ñoqanchikwanqa kachkan
Llapallan Kamachiq Tayta Diosmi.
Ñoqanchikta pakaykuwaqninchikqa
Jacobpa Diosninmi.
(Samariy)