Diospa amparakuynin mañakusqanmanta
Takiqkunapa maestronpaq, yuyaymananapaq Coreypa mirayninpa takisqan
44
Diosnillayku,
ñoqaykum uyarirqaniku
ñawpaq tiempokunapi
imam rurasqaykimanta.
Abueloykum willawarqaku
paykunapa tiemponpiqa
imam rurasqaykimanta.
2 Qanmi nacionniyoq
runakunata qarqorqanki.
Abueloykutañam chayman
churarqanki.
Llapa runakunatam
castigaspa wischurqanki.
3 Yachanankupaq allpakunataqa
qechukurqaku manam espadallankuwanchu.
Paykunaqa librakurqaku
manam kikinkupa kallpallankuwanchu.
Alleq makillaykiwanmi
chay allpakunataqa qechurqanki.
Qamqa atiyllaykiwanmi
paykunataqa libraykullarqanki.
Paykunatam yanaparqanki
allin ñawikiwan qawarispayki.
Qamqa paykunaraykum
kusisqa kanki.
4 Diosnilláy,
qamllam kanki reynillayqa.
Jacobpa castankunapaqyá
apachimuy salvacionnikitaqa.
5 Qam yanapawaptikikum
enemigoykutaqa wichichiniku.
Qam yanapawaptikikum
atacawaqniykutaqa sarupaniku.
6 Manapunim hapipakunichu
flechanaypiqa.
Salvawananpaqqa manataqmi
hapipakunichu espadaypiqa.
7 Enemigoykumantam
salvaykuwarqankiku qampuni.
Cheqniwaqniykutam
penqayman churarqanki qampuni.
8 Diosnilláy,
tukuy tiempom
qanmanta alabakusaqku.
Diosnilláy,
wiña-wiñaypaqmi
graciasta qosqaykiku.
(Samariy)
9 Ichaqa qanmi ñoqaykutaqa
wischuruwankiku.
Ichaqa qanmi ñoqaykutaqa
penqarachiwankiku.
Tropaykutapas manañam qamqa
yanapankichu.
10 Enemigoykupa qayllanpim
mana yanapawarqankikuchu.
Chaymi ñoqaykuqa
qepamanña suchurirqaniku.
Cheqniqniykum
imapas munarisqankuta
qechuwanku.
11 Wañuchinapaq ovejata hinam
qoykuwarqankiku.
Lliw nacionkunamanmi
cheqechiwarqankiku.
12 Mana imallapaqmi
rantikuruwankiku runaykikunataqa.
Manam imaniraqtapas
ganarqankichu rantikusqaykimantaqa.
13 Llapa vecinoykupa
insultanallantam ruraruwankiku.
Muyuriqniykupi yachaqkunapa
burlakunallantam
ruraruwankiku.
Muyuriqniykupi yachaqkunapa
asikunallantam ruraruwankiku.
14 Nacionkunapa chawpinpim ruraruwankiku
watuchimanta hina rimakunankuta.
Runakunapa chawpinpim ruraruwankiku
burlakunallankuta.
15 Tukuy punchawmi
penqaypa intusqallan kachkani.
Uyallaypas
pukayasqam kachkani.
16 Chaynam kachkani
insultawaqniy runarayku.
Chaynam kachkani
kamiwaqniy runarayku.
Chaynam kachkani
vengakuqniy enemigoyrayku.
17 Kaykunaqa pasawanku
manam qamta qonqaruptiykuchu.
Qampa contrato rurasqaykitaqa
manam faltakurqanikuchu.
18 Qanmantaqa sonqoykuqa
manam qepamanqa kutirirqachu.
Munasqaykiman hina kawsakuymantaqa
chakillayqa manataqmi pantarqachu.
19 Ichaqa qanmi
atoqkunapa yachananpi saruparuwarqankiku.
Ichaqa qanmi
sinchi tutayaywan taparachiwarqankiku.
20 Diosnillayku,
sichum sutikita
qonqaruymanku karqa,
sichum mana reqsisqayku kawsaq Diosta
mañakuymanku karqa
21 hinaptinqa ¿manachum
yacharuwaq karqa chaytaqa?
Qamqariki yachankipunim
sonqollaypipas pakasqa kaqtaqa.
22 Ichaqa tukuy punchawmi
qamrayku wañuypa patanpi kachkaniku.
Wañuchinankupaq apasqanku
ovejakunata hinam qawawanku.
23 Señorlláy,
rikchariyñayá.
Amañayá puñuyñachu.
Señorlláy,
rikchariyñayá.
Amayá wiñaypaqqa wischuruwaykuchu.
24 Señorlláy,
¿Imanasqamá pakakuchkanki ñoqaykumantaqa?
¿Imanasqamá qonqarunki ñakarisqaykutaqa?
¿Imanasqamá qonqarunki sasachakuyniykutaqa?
25 Ñoqaykuqa pampakama
humillasqam kachkaniku.
Ñoqaykuqa allpakama
pakchakusqam kachkaniku.
26 Hatarispayá
ñoqaykutaqa yanapaykuwayku.
Kuyapayakuq kasqaykiraykuyá
libraykuwayku.