Defiendenanpaq Tayta Diosta mañakusqanmanta
43
Diosnilláy,
allin arreglotayá ruraykapullaway.
Qanman mana iñiqkunamantayá
asuntollaypi defiendeykuway.
Mana allin ruraq llullakunamantayá
libraykullaway.
2 Diosnilláy,
amparakuq wasi hinapunim
qamqa kanki.
¿Imanasqamá ñoqallaytaqa
qamqa wischurullawanki?
¿Imanasqamá enemigoykunaraykuqa
kayna llakikuypiqa purillasaq?
¿Imanasqamá enemigoykunapa ñakarichisqanqa
waqastillanqa purillasaq?
3 Qampa achkillaykitayá apachimuway.
Cheqap kaqnillaykitayá apachimuway.
Chaykunayá ñoqallaytaqa pusawachun
qampa sapaqchakusqayki orqoman.
Chaykunayá ñoqallaytaqa pusawachun
qampa yachanaykikunaman.
4 Diosnilláy,
ñoqam chayamusaq
altarnikipa kasqanman.
Chayasaqmi llumpay kusikuy qowaqniy
Diosniypa kasqanman.
Yupaychasqay Diosnilláy,
arpawan takispam
graciasta qomusqayki qanman.
5 ¿Imamantamá
ñoqallayqa hukmanyaruyman?
¿Imamantamá
ñoqallayqa preocupakuyman?
Diosnillaypim suyasaq ñoqallayqa.
Paytaqa alabasaqmi ñoqallayqa.
Payllam ñoqallaypa salvaqniyqa.