ISKAY KAQ LIBRO (42-72)
Diosmantam yakunayachikuq hina kachkani.
Takiqkunapa maestronpaq, yuyaymananapaq Coreypa mirayninkunapa takisqan.
42
Yakunayachikuq tarukam waqan
yakuyoq mayuta maskaspa.
Diosnilláy,
chaynapunim
purillachkani qamta maskaspa.
2 Yakunayachikuq hinam kachkani
Diosnillaymanta.
Yakunayachikuq hinam kachkani
kawsaq Diosmanta.
¿Haykapiñataq Diosniypa
kasqanman risaq?
¿Haykapiñataq Diosniypa
kasqanman yaykusaq?
3 Tuta-punchawmi millpuchkani weqellayta.
Sapa kutillam tapuwanku ñoqallayta:
“¿Maypitaq kachkan Diosnikiqa?”
nispa.
4 Chaykunamanta yuyariptiymi
sonqollay waqan yawarta.
Yuyarinim nana-nanaq runakunawan
imaynam purisqayta.
Ancha kusikuyllawanñam
paykunata pusarqani Diospa templonman.
Graciasta qostinmi
paykunata pusarqani Diospa templonman.
Diospaq fiesta kachkaptinmi
achkallaña runakunata
pusaykurqani paypa templonman.
5 ¿Imamantamá ñoqallayqa hukmanyaruyman?
¿Imamantamá ñoqallayqa preocupakuyman?
Diosnillaypim suyasaq ñoqallayqa.
Paytaqa alabasaqraqmi ñoqallayqa.
Payllam ñoqallaypa salvaqniyqa.
6 Payllataqmi ñoqallaypa Diosniyqa.
Llumpay hukmanyasqam ñoqallayqa kachkani.
Chayraykum qanmanta ñoqallayqa yuyarillani.
Jordan Mayu lawpi kaspaymi
ñoqallayqa qanmanta yuyarini.
Mizar Moqopi kaspaymi
ñoqallayqa qanmanta yuyarini.
7 Paqchaq yakullayki qapariptinmi
qaqakuna yachapayanakun.
Olallaykikunam orqochakuspan
ñoqapa hawallayta pasarun.
8 Punchawpim apachimuwan
kuyakuyninta Tayta Diosqa.
Tutankunañataqmi sonqollaypi kachkan
paypa takinkunaqa.
Kawsay qowaqniy Diosnillaypaqmi
kachkan mañakuyniyqa.
9 Qaqa hina harkaykuqniy Diosnillaytam
nini kaynata:
“¿Imanasqamá qonqaruwanki ñoqallaytaqa?
¿Imanasqamá enemigoykunaraykuqa
kayna llakikuypiqa purisaq?
¿Imanasqamá enemigoykunapa
ñakarichisqanqa purisaq?”
10 Tullullaykuna pakipachkaq hinam
enemigoykuna kamipayawanku.
Tukuy punchawmi tapupayawanku:
“¿Maypimá kachkan Diosnikiqa?”
nispanku.
11 ¿Imamantamá hukmanyaruyman?
¿Imamantamá preocupakuyman?
Diosnillaypim suyasaq ñoqallayqa.
Paytaqa alabasaqraqmi ñoqallayqa.
Paymi yanapaykuwan ñoqallaytaqa.
Payllataqmi ñoqallaypa Diosnillayqa.