Onqoq runapa mañakusqanmanta
Takiqkunapa maestronpaq, Davidpa Diosman takisqan
41
Mayna kusisqamya
wakcha runakuna nanachikuq runaqa.
Sasachakuy tiempopipas
Tayta Diosllam libraykunqa paytaqa.
2 Chayna runataqariki
Tayta Diosmi waqaychaykun sumaqta.
Chayna runataqariki
Tayta Diosmi kawsachinqa sumaqta.
Payqariki kay pachapim
anchallaña kusisqaraq kallanqa.
Diosqa manam qoykunqachu
payta cheqniq enemigollanmanqa.
3 Onqosqaña kaptinñapas
Tayta Diosmi kallpanchanqa paytaqa.
Onqoptinpas camantapas
allichaspam cuidallanqa paytaqa.
4 Tayta Diostamiki niykullarqani:
“Dios Taytalláy,
llakipayariykuwayá ñoqallayta” nispa.
“Dios Taytalláy,
sanoyaykachillawayá ñoqallayta” nispa.
“Dios Taytalláy,
huchallikurullanimá contraykipi” nispa.
5 Enemigoykunam tapunakunku:
“Achachalláw,
kay runaqa ¿haykapimá wañukunqa? ”
nispa.
“Achachalláw,
sutillanpas ¿haykapimá chinkarunqa?”
nispa.
6 Watukuqniy hamuspapas llullallatam rimakunku.
Sonqonpipas kamiyllatam paykunaqa taqekunku.
Hawamanraq lloqsiruspam willakachakurullanku.
7 Llapachallan cheqniwaqnillaykunamya huñunakurunku.
Paykunaqariki contrallaypiraqmi wachachacharunku.
Contrallaypiraqmi mana allinllatapuni piensarunku.
8 “¡Ima plagach kay runata hapirunpas!”
nispanraqmi ninku.
“Camanmantam mana hatarinqañachu”
nisparaqmi ninku.
9 Confiakusqay kuyaqmasillaypas contraypiraqmiki karqa.
Ñoqallaypa mikuqmasillaypas despreciaqniyraqmi karqa.
10 Qam Dios Taytam llakipayaykuspa hatariykachiwankiqa.
Merecesqan pagapunaypaqmi hatariykachiwankiqa.
11 Kayna pruebawanmá yachaykusaq qamta agradasqaytaqa.
Amapuniñayá venceruwachunchu enemigollayqa.
12 Waqaychawankimá mana faltayoqña kawsallasqayrayku.
Wiña-wiñaypaqmá takyaykachiwanki qanwan kanayrayku.
13 Wiñaymanta wiñaykamayá Israelpa
yupaychasqan Tayta Diosqa alabasqa kachun.
Chaynayá kachun.
Chaynayá kachun.