Diospa librasqanmanta alabanza
Takiqkunapa maestronpaq, Davidpa Diosman takisqan
40
Llumpay pacienciawanraqmi suyarqani
Tayta Diosniytaqa.
Kurkuykusparaqmi uyariykamullawarqa
ñoqataqa.
2 Wañuy pozomantaraqmi horqoykamuwarqa
ñoqataqa.
Mitu timpukuchkaq lliwamantam horqowarqa
ñoqataqa.
Allin taqra rumipitaqmiki payqa sayachiwarqapas.
Paytaqmiki takyaykachillarqa lluchkaq chakiykunatapas.
3 Kikintaqmi simiymanpas churaykurqa mosoq takinayta.
Kikintaña alabanaypaqmi qoykuwarqa takinayta.
Achkallaña qawaqkunam Tayta Diosta respetallanqaku.
Achkallaña qawaqkunam Tayta Diospi confiakullanqaku.
4 ¡Mayna kusisqamya Tayta Diosllamanña hapipakuykuqqa!
Payqa manam juntakunchu orgulloso runakunawanqa.
Payqa manam juntakunchu taytachata adorallaqwanqa.
5 Yupaychasqay Dios Taytalláy,
Achka-achkallañam milagrokunapas rurallasqaykiqa.
Achka-achkallañam favorniykupipas tanteallasqaykiqa.
Manam pipas yupaytaqa atinmanchu rurasqaykitaqa.
Manach willaytapas atiymanchu rurallasqaykimantaqa.
6 Wañuchisqa animalkunatam mana munarqankichu.
Kawsaymanta ofrendakunatam mana munarqankichu.
Qanmi kichaykullarqanki ñoqallaypa rinrillaytapas.
Manam mañakurqankichu lliw kañasqa animaltapas.
Manam mañakurqankichu hucharayku ofrendatapas.
7 “Kayqayá hamuchkani” nispamiki
nillarqani ñoqallayqa.
“Kachkanmá wankuykusqa libropipas
ñoqamanta qellqallayqa:
8 ‘Diosnilláy,
munachkanim munallasqaykiman
hina rurallayta.
Diosnilláy,
sonqollaypim waqaychani
qampa yachachisqaykita.’ ”
9 Dios Taytalláy,
achka runakunamanmi willakullarqani
allin ruraymanta.
Qamqariki yachachkankim ñoqallayqa
mana upallasqaymanta.
10 Manam upallarqanichu allinkuna
rurallasqaykimantaqa.
Ñoqallayqa willakullarqanim confiakuna
kasqaykimantaqa.
Ñoqallayqa willakullarqanim qampa
salvacionnikimantaqa.
Nana-nanaq huñunasqa runaykikunapa
ñawpaqnillanpiqa.
Qampa kuyapayakuynikitam manapuni
pakaykurqanichu.
Confiakuna kallasqaykimantam manapuni
pakaykurqanichu.
11 Dios Taytalláy,
amayá negaykullawaychu
qampa llakipayakuynillaykitaqa.
Tukuy tiempo waqaychallawachun
qampa kuyapayakuynikiqa.
Tukuy tiempo waqaychallawachun
qampa confiakuna kaynikiqa.
12 Mana yupay atinañam tukuy
mana allin muyuykurullawan.
Ñawsayanaykamam mana allin
rurallasqay hapikurullawan.
Chukchay hina mana yupanañam
kachkan mana allin rurasqayqa.
Sonqollaypas hukmanyanankamam
achkayarun huchallikusqayqa.
13 Dios Taytalláy,
qamqa kallpamuspayá ñoqallayta libraykullaway.
Dios Taytalláy,
qamqa utqamuspayá ñoqallayta yanapallaway.
14 Penqaypiyá kachunku
llapallan wañuchiway
munaqkunaqa.
Qepamanyá kutichun
llapallan dañaruway
munaqkunaqa.
Penqaypiyá kachunku
llapallan dañaruway
munaqkunaqa.
15 Penqaypiyá kachunku
ñoqallay asipayawaqniykunaqa.
Muspaypiyá kachunku
ñoqallay asipayawaqniykunaqa.
16 Llapallan maskaqnikikunayá kusikuchunku.
Llapallan maskaqnikikunayá asirichunku.
“Tayta Diosqa hatunchasqa kachun”
niqkunayá kusikuchunku.
Qampa salvacionnikita kuyallaqkunayá
kusikuchunku.
17 Ñakariqña kallaptiypas
Tayta Diosnillaymá qonqallawanchu.
Wakcha runa kallaptiypas
Tayta Diosnillaymá qonqallawanchu.
Qamqariki ñoqallayta
yanapawaspamá dejawankichu.
Amapunim yupaychasqay sumaq
Dios Taytalláy unamunkichu.