Kawsakuyqa wayta hina chakiruqlla kasqanmanta
Takiqkunapa maestron Jedutun sutiyoq runapaq, Davidpa Diosman takisqan
39
Ñoqam prometekurqani kawsallasqaypipas
allinllaña kawsanaypaq.
Ñoqam prometekurqani rimallasqaywanpas
mana huchallikunaypaq.
Ñoqam prometekurqani rimanaymantapas
simiy senqaparunaypaq.
Mana allin runakuna qawawasqanraykum
chaynatachu rurallasaq.
2 Ñoqam upallakuykuspay manapuni
imatapas rimarirqanichu.
Allin kaqkunamantapas manamiki
imatapas rimarirqanichu.
Ñoqallayqa llakillaymantapas manapunim
asllatapas allinyarinichu.
3 Ñoqapaqariki sonqollaypas ukullaypim
llumpaysuta ruparirqa.
Yuyaymanallachkaptiymi ukuypipas
ruparichkaq nina ratarirqa,
hinaptinmi ñoqallaypa simillayqariki
rimariyta qallarirqa.
4 Dios Taytalláy,
willaykuwayá
ima punchaw wañukunayta.
Dios Taytalláy,
willaykuwayá
hayka watam kawsakunayta.
Dios Taytalláy,
yachaykusaqyá
maynachallam kawsanaymanta.
5 Ñoqallayman kawsay qoykuwasqaykiqa
makiypapas cuartan hinallam.
Ñawpaqnikipiqa watallaykunapas
yanqa imallapas hinallam.
Ñoqaykuqa kawsaspapas-kawsaniku
samay chinkaruchkaq hinallam.
6 Ñoqaykuqa kawsaniku kayman-wakman
pasaruchkaq llantuy hinallam.
Tukuy imamanta afanakuykuyqa
waspiruchkaq samay hinallam.
Qori-qollqe huñukusqa kaqpas
manam waqaychasqañachu kallanqa.
Pipa hapikuykusqanpas manapuni
yachakuqñamiki kallanqa.
7 Señornilláy ¿imatamá suyallayman ñoqallayqa?
Señornilláy ¡qamllapimá confiakuni ñoqallayqa!
8 Librawayá tukuy imapipas mana kasukusqaymanta.
Librawayá rumi sonqo runakuna kamiwananmanta.
9 Ñoqallaymá upallaykurqani imam rurasqaykirayku.
Simiytamá kicharirqanichu imam rurasqaykirayku.
10 Qampuniyá castigawasqaykitaqa asuriykachiyña.
Ñoqallaymá maqawasqaykiwan wañunayallachkaniña.
11 Runatamá mana allin rurallasqanmanta correginki.
Paypatamá kuyasqanta puyusqata hina chinkachinki.
Runatamá waspiruchkaq samaytapas hina chinkachinki.
12 Dios Taytalláy,
mañakusqaytayá uyariykullaway.
Dios Taytalláy,
qayakusqaytayá uyariykullaway.
Dios Taytalláy,
waqallasqaytayá contestaykullaway.
Forastero hinamiki,
kaypi-wakpi
yachallachkani qanwanqa.
Abuelollaykuna hinam
kaypi-wakpi
yachallachkani ñoqaqa.
13 Ama qawapayawaychu tumpallapas
kallpancharisqa kanaypaq.
Manaraqpas wañukullachkaspay
sumaq kallpancharisqa kanaypaq.