Tayta Diospa yanapakuynin mañakusqanmanta
Yuyarinapaq, Davidpa Diosman takisqan
38
Dios Taytalláy,
amayá qaqchallawaychu piñakuspaqa.
Dios Taytalláy,
amayá castigawaychu rabiakuspaqa.
2 Flechallaykikunam ñoqallayta clavaruwan.
Qampa makillaykim ñoqallayta ñitiruwan.
3 Cuerpollaypas manam sanoñachu kapuwachkan.
Piñakurusqaykiraykumiki chayna kachkan.
Tullullaykunapas mana sanoyaqñam kachkan.
Huchaykunaraykumiki chaynapuni kachkan.
4 Mana allin rurasqaymi ñitiruwachkanña.
Llasaq carga hinaraqmi ñitiruwachkanña.
5 Loco hina rurasqayraykum
heridallaypas asnarichkanña.
Loco hina rurasqayraykum
heridallaypas ismurichkanña.
6 Ñoqallayqa chayraykumiki
kurkunpallaña purichkanipas.
Ñoqallayqa chayraykumiki
humillasqaña purichkanipas.
Ñoqallayqa tukuy punchawmi
lutokusqaña purichkanipas.
7 Ñoqapaqa tukuy wasaypas
llumpayllatañam ruparillachkan.
Ñoqapaqa tukuy cuerpoymi
onqosqallaña kapullawachkan.
8 Ñoqapaqa tukuy cuerpoymi
kapullawachkan susunkasqaña.
Ñoqapaqa tukuy cuerpoymi
kapullawachkan ñutupasqaña.
Sonqollaypas hukmanyaptinmi
hikikyachkani anchallataña.
9 Señor,
qamqa yachachkankim imakunam
munallasqaytaqa.
Llaki hapillawasqanpas manam pakasqachu
qanmantaqa.
10 Ñoqapaqa sonqollaypas apurawllamanñam
patpatyachkan.
Ñoqapaqa kallpallaypas pasaypaqtañamya
chinkarichkan.
Ñoqapaqa ñawillaypas tutayasqañamya
kapuwachkan.
11 Onqorusqayraykum kuyaqllaykunapas
karunchakurunku.
Onqorusqayraykum runamasillaypas
karunchakurunku.
Onqorusqayraykum ayllullaykunapas
karunchakurunku.
12 Wañunayta munaqkunam
toqllataraq churarapuwanku.
Dañawayta munaqkunam
chinkachiwananpaq rimarunku.
Traicionawanankupaqmi
tukuy punchaw rimanakurunku.
13 Ñoqam ichaqa mana paykunata uyariqpas tukunichu.
Ñoqam ichaqa mana rimay atiq hina mana rimanichu.
14 Chaymi ñoqaqa rikurirullani mana uyarikullaqña.
Chaymi ñoqaqa rikurirunipas mana kutipakullaqña.
15 Dios Taytalláy,
ñoqallayqa qamtam suyallachkayki.
Señor Diosnilláy,
ñoqallaytam qamqa contestawanki.
16 Ñoqam mañakullani ñoqamantaqa
ama asikuwanankupaq.
Ñoqam mañakullani urmaruptiyqa
ama hatunchakunankupaq.
17 Ñoqallayqariki wichiykunaypaqñam kallachkani.
Llakikuypa sapa punchaw intusqanmi kallachkani.
18 Mana allin rurallasqaymantam willakullachkani.
Huchaykunamantam preocupasqallaña kallachkani.
19 Ñoqallaypa enemigollayqa kawsachkankuraqmi.
Paykunaqariki kachkankupas kallpasaparaqmi.
Yanqamanta cheqniwaqnillayqa mirachkankuraqmi.
20 Allin kaqta ruraptiypas
hukman kaqtam qoykuwanku.
Allin kaqta ruraptiymi
contraypiraq sayarinku.
21 Dios Taytalláy,
amapuniyá sapallaytaqa saqeruwaychu.
Dios Taytalláy,
amapuniyá ñoqamantaqa karunchakuychu.
22 Dios Taytalláy,
utqaymanñayá yanapaykuway ñoqallaytaqa.
Salvaqnilláy,
utqaymanñayá yanapaykuway ñoqallaytaqa.