Mana allin ruraqkunapa kawsasqanmanta
Davidpa takisqan
37
Amayá piñapakuychu
hucha ruraqkunamantaqa.
Amayá envidiakuychu
pantachikuqkunamantaqa.
2 Paykunaqa pasto hinam
chaylla qawirunku.
Paykunaqa qora hinam
chaylla chakirunku.
3 Qamtaqyá allinta ruray
Tayta Diosman hapipakuspa.
Qamtaqyá allpapi yachay
confianzawan kawsakullaspa.
4 Qamtaqyá Tayta Diosmanta
anchallataña kusikuykuy.
Kikinmá qoykullasunki
sonqoykipapas munasqanta.
5 Qamtaqyá Tayta Diosmanqa
vidallaykita entregaykuy.
Paypiyá confiakuy qamqa.
Payqa ruraykullanqam lliwta.
6 Paytaqmá allin kaynikita
kancharinqa achkiyta hina.
Paytaqmá derechoykitapas
kancharichinqa intita hina.
7 Upallayá Tayta Diospa qayllanpiqa.
Amataqyá piñakuychu pipas mejorakuptinqa.
Diospitaqyá pacienciawan suyay qamqa.
Amataqyá piñakuychu hukmanllata tanteaptinqa.
8 Amataqyá piñakuychu llumpaytaqa.
Llumpaytamá huchallirachisunkiman chaykunaqa.
Amataqyá rabiakuychu sinchitaqa.
Llumpaytamá huchallirachisunkiman chaykunaqa.
9 Tukunqamá mana allin ruraqkuna.
Allpatamá dueñoyanqa Tayta Diospi suyaqkuna.
10 Mana allin ruraqkunaqa chayllapunim kanqañachu.
Maskaspapas paykunataqa manapunim tarinkichu.
11 Ñakariqmi ichaqariki dueñoyanqa allpatapas.
Paykunaqa kusikuywanmi hawkayaypi kawsanqapas.
12 Mana allin runaqariki hukmanllatam tanteaykuchkan.
Allin ruraq runakunapa contrallanpim tanteaykuchkan.
Paykunapa contranpiraqmi kiruntapas kachupachkan.
13 Señorpunim asikullanqa mana allin runamanta.
Yachachkanmi Señorqariki castiganan punchawmanta.
14 Mana allin runakunaqa espadankutam horqonku
ñakariqkunata wichichinankupaq.
Mana allin runakunaqa flechankutam chutanku
mana imayoqta wichichinankupaq.
Chaynataqa paykunamiki rurallachkanku Diospaqña
kawsaqkunatapas wañuchinankupaq.
15 Espadallankuwanmi tuksikurullanqa.
Flechana arconkupas pakipasqam kanqa.
16 Mana allin runakunapa achkallaña kapuqninmantaqa
allin ruraqkunapa pisillapas kapuqninmi allinqa.
17 Mana allin runakunapa atiyninqa
chinkachisqam kanqa.
Allin ruraqkunatam Tayta Diosqariki
takyaykachinqa.
18 Tayta Diosmi nanachikun
mana huchayoq runakunamanta.
Wiñaypaqmi qoykullanqa
tukuy herencia kapuqninkunata.
19 Muchuy tiempokunapipas
manam pasaypaq penqakunqakuchu.
Yarqay tiempokunapipas
manam pasaypaq muchullanqakuchu.
20 Mana allinllata ruraq runakunaqariki
puchukachisqam kanqa.
Pastokuna hinam Diospa enemigonkunaqa
puchukachisqa kanqa.
Qosnikuna hinam Diospa enemigonkunaqa
chinkarachisqa kanqa.
21 Mana allin runaqa prestakuykuspapas
mana pagakuqmi.
Allin ruraq runaqa llakipayakuspa
chaylla qokuykuqmi.
22 Tayta Diospa favorecesqan runakunaqa
allpatam dueñochakunqaku.
Tayta Diospa ñakaykullasqan runakunaqa
llapanmi chinkarullanqaku.
23 Runataqa maymanña rillaptinpas
Tayta Diosmi pusallachkan.
Kawsasqanwan agradaq runataqa
Tayta Diosmi takyachichkan.
24 Payqa wichiykuspanpas manapunim
pampapiqa kallanqachu.
Tayta Diosmi paytaqa hapillaspan
mana wichiykachinqachu.
25 Ñawpaq warma kaspaypas,
kunan yuyaq kaspaypas
allin runataqa manam
qonqarusqataqa rikurqanichu.
Wawa-churintapas manam
limosnakuqtaqa rikurqanichu.
26 Allin ruraq runaqa
tukuy tiempopipas kuyakullaqmi.
Imallanpas prestaykuqmi
chayna kawsakullaq runaqariki.
Mirayllanpas ancha-ancha
bendecisqataqmi kallanqariki.
27 Qamyá asurikuy mana allin ruraymanta.
Qamyá tukuy tiempo ruray allin kaqkunata.
Wiñaypaqmi kawsakunki chaynataña rurallaspaqa.
28 Tayta Diosqa kuyanmiki
allin ruray arreglotaqa.
Payqa manam saqenqachu
payllamanña iñiykuqtaqa.
Diosqa wiñaypaqmi
waqaychaykullanqa paykunataqa.
Mirayninpas chinkarunqam
mana allin rurallaqpaqqa.
29 Allin ruraq runakunam
allpataqa dueñoyanqaku.
Paykunaqa chaypimiki
wiñaypaqraq kawsakunqaku.
30 Allin ruraq runaqa
allin yachaywantaqmi riman.
Allin ruraq runaqa
allin arreglomantam riman.
31 Diosnillanpa yachachisqanpas
sonqonpipunim kachkan.
Chakillanpas chayraykumiki
takyaykullaqraq kachkan.
32 Mana allin runaqa
allin ruraqtamya wateqachkan.
Allin ruraq runata
wañuchinanpaqmi wateqachkan.
33 Tayta Diosmi ichaqa
mana dejanqachu wichinanta.
Juiciopiña kaptinpas
manam dejanqachu pierdenanta.
34 Tayta Diospi confiakuspa kasukuypuni payllata.
Hatunchaspam qoykusunki dueñoyanayki allpata.
Puchukaqtam qawaykunki mana allinlla ruraqta.
35 Rikurqanim manchakuypaq mana allin runatapas.
Rapisapa sacha hinam payqa chutarikurqapas.
36 Chinkarusqanraykum haykapipas tarikurqañachu.
Maskaspapas manam ñoqallayqa tarirqaniñachu.
37 Qawaykuyá mana culpayoqña kawsakullaq runataqa.
Rikuykuyá Diospa munasqanman hina kawsaq runataqa.
Allinsumá kanqa hawka kawsakuqqa hamuq tiempopipas.
38 Tukunqamá llapachallan manapuni kasukuqkunapas.
Chinkanqamá huchallikuruqkunaqa hamuq tiempopipas.
39 Tayta Diosmi allin runakunapa salvaykuqninqa.
Payllam sasachakuy tiempokunapi amparaqninqa.
40 Tayta Diosllapunim paykunataqa yanapaykunqa.
Tayta Diosllapunim paykunataqa libraykullanqa.
Mana allin ruraq runamantapas libraykullanqam.
Mana allin ruraq runamantapas salvaykullanqam.
Amparakuptinkum Tayta Diospuni salvaykullanqa.