Diospa kuyapayakuyninmanta
Takiqkunapa maestronpaq,
Tayta Diospa serviqnin Davidpa takisqan
36
Mana kasukuymi rimapayan sonqollanpi
mana allin runataqa.
Manam payqa haykapipas yuyarinchu
Diosllatapas respetaykuytaqa.
2 Kikillanmi hatunpaqña hapikuspa
mana qawakunchu huchantaqa.
Kikillanmi hatunpaqña hapikuspa
mana cheqnillanchu huchantaqa.
3 Paypa rimasqankunaqa tukuy
mana allinkunam,
tukuy llullallañam.
Payqa rikurirun mana tanteakuqñam,
allin kaqpas mana ruraqllañam.
4 Puñunanpi huchallata tanteaspanmi
mana allinllapi kawsakuchkan.
Huchamanta rakikuyta mana munaspanmi
huchallapi kawsakuchkan.
5 Dios Taytalláy,
cielomanpas chayaruchkaq hinam
llumpayllaña kuyapayakuynikiqa.
Puyumanpas chayaruchkaq hinam
achka-achka confianapaq kaynikiqa.
6 Ukullaña lamar qocha hinam
allin arreglopas ruraykusqaykiqa.
Dios Taytalláy,
llapachallan runakunatawan
animalkunatam waqaychallankiqa.
7 Diosnilláy
¡mayna-mayna valorniyoqllañam
qampa hatun kuyapayakuynikiqa!
Imaynallam chiwchikuna mamankupa
raprallankunapi amparakun,
chaynallatam lliw runakunapas
qampa llantuynikipitaq amparakun.
8 Paykunaqa wasikipi allin
mikuykunawanmi saksaykullanqaku.
Mayumanta miskillaña yakutapas
qoykuptikim tomaykullanqaku.
9 Yaku toqyamuchkaq hinaraqmi
tukuy kawsakuyqa qamllamanta hamun.
Chaynataqmiriki qawasqayku
achkiyllapas hina qamllamanta hamun.
10 Qamta reqsiqnikikunamanqa
kuyapayakuynikita qoykarimuy.
Qampa munasqayki hina piensaqkunamanqa
arregloykitataq qoykarimuy.
11 Lliw orgullosokunapas amapunitaqyá
tanqaykullawachunkuchu.
12 Qawariychik,
wichiykurunkuñam
mana allinkuna ruraykuqkunaqa.
Huktawanraq manapuni sayarinanpaqmi
wichiykunku paykunaqa.