Tayta Diospa yanapakuynin mañakusqanmanta
Davidpa takisqan
35
Dios Taytalláy,
qamyá sayariy contraypi sayarillaqkunaman.
Qamyá pawaykuy contraypi pawaykuwaqnillayman.
2 Qamyá hapiytaq taksalla harkachikunaykita.
Qamyá hapiytaq hatunneq harkachikunaykita.
Qamyá sayaspa sumaqta yanapaway ñoqata.
3 Qamqa lanzaykita horqoykuspayá
wichqay qatiwaq enemigoykunapa ñanninta.
“Ñoqam salvaqniki kani” nispayá
kikikimanta rimapayaykullaway ñoqata.
4 Penqaypiraqyá kachunku
wañuchiwaqniy munaqkunaqa.
Humillasqayá kachunku
wañuchiwaqniy munaqkunaqa.
Qepamanraqyá kutichun
mana allinniy munaqkunaqa.
5 Chaynallataqyá kachunku
wayraykachisqa qopa hinaraq.
Wayrachichunyá llapanta
Tayta Diosniypa angelnillanraq.
6 Tutayaqñayá kallachun
lliw paykunapa chayna ñanninqa.
Lluchkallañayá kallachun
lliw paykunapa chayna ñanninqa.
7 Mana imanachkaptiymi
paykunaqa uchkumanraq wichiykachiyta munawarqaku.
Mana imanachkaptiymi
wichiykachiwanankupaq hatun uchkuta toqorurqaku.
8 Qonqaymanta wichiykuchun
toqlla rurakuykusqanman.
Wichiykuspa chinkaruchun
uchku ruraykusqanman.
9 Tayta Diospim kusikusaq.
Salvaykullawasqanraykum ñoqaqariki kusikullasaq.
10 Chaymi ñoqaqa tukuy sonqoywan kaynata nisaq:
Dios Taytalláy,
pipas manapunimriki kallanchu qanman igualaqqa.
Qamqa ñakarichiqmantam libranki ñakarillaqtaqa.
Qamqa salteaqkunamantam libranki ñakariqkunataqa.
Qamqa salteaqkunamantam libranki wakcha runataqa.
11 Daño rurawananpaqmi testigokuna sayarirunku.
Mana yachallasqaymantam contrakuqkuna tapuykuwanku.
12 Allin rurallasqaymantam mana allinwan kutichiwanku.
Llakichiwanankupaqmi chaynatapuni ruraruwanku.
13 Ñoqam llakikuyllawanña purillarqani onqoptinkupas.
Ñoqam llakikuyllawanña ayunarqani onqoptinkupas.
Siemprem ñoqallayqariki ukullaypipas mañakurqani.
14 Ñoqam humillasqallaña lutokuykuspa purillarqani.
Kuyaqmasillaymantapas hinaraqmiki purillarqani.
Kuyay wawqellaymantapas hinaraqmiki purillarqani.
Kuyay mamallaymantapas hinaraqmiki llakikurqani.
15 Ñoqa urmarullaptiyqa huñunakuspam kusikurqaku.
Mana yachasqaytaraqmi wistutyaspanku asikuwanku.
Mana samaykusparaqmi ñoqallaytaqa maqallawanku.
16 Mana allin runakunam wistuta hina burlakuwanku.
Kachupakuspankuraqmi cheqnikuyninta qawachiwanku.
17 Señornilláy ¿haykapkamam qawallanki kaykunata?
Qampuniyá libraykuway qolluchiqniykunamanta.
Qampuniyá libraykuway leonpapas siminmanta.
18 Qamllatamá gracias nisaq hatun huñunakuypipas.
Qamllatamá alabasaq achka runa kasqanpipas.
19 Amapuniyá kusikuchunchu
yanqamanta rikuriruq enemigoypas.
Amapuniyá qemchiwachunchu
yanqamanta cheqniwaqniy enemigoypas.
20 Manapunimá enemigoyqa
rimarinchu hawkallaña kawsaymantapas.
Engañotamá tanteanakunku
hawkallaña kawsakuypa contrallanpipas.
21 Contraypiraqmá siminkutapas
hatunsuta kicharispa niwan kaynata:
“Qawaykunchikmá kusikuywanraq
kay runapa desgraciaman wichiykusqanta.”
22 Dios Taytalláy,
amamariki qawallasqaykimantaqa upallankichu.
Señor Diosnilláy,
amapunitaq ñoqallaymantaqariki karunchakuychu.
23 Señor Diosnilláy,
rikchariruspa
allin arreglollataña ruraykapuway.
Señor Diosnilláy,
hatariruspa
tukuy asuntoymantapas defiendeykuway.
24 Dios Taytalláy,
allin kaspaya
allin arreglollataña ruraykapuway.
Yupaychasqalláy,
ñoqallaymanta
mana asikunanpaqya ruraykapuway.
25 Amapuniyá piensachunkuchu:
“Kaytam munallarqanchikqa” nillasparaqqa.
Amapuniyá piensachunkuchu:
“Millpuypaqmi-millpurunchik” nikusparaqqa.
26 Llapallankuyá ñoqallaymanta
miski asikuqkunaqa penqaypi kachun.
Llapallankuyá ñoqallaymanta
miski asikuqkunaqa pantaypi kachun.
Penqachisqayá kachunkuriki
llapan hatun tukuqllaña contrawaqniyqa.
Humillasqayá kachunkuriki
llapan hatun tukuqllaña contrawaqniyqa.
27 Takichunkuyá mana culpayoq
kasqaymanta favorniypi runakunaqa.
Kusikuchunyá mana culpayoq
kasqaymanta favorniypi runakunaqa.
“Hatunchasqayá kallachunriki
Tayta Diosqa” nisparaqya nillachunkupas.
“Diosqa munanmá serviqnillanqa
hawka kananta” nisparaqya nillachunkupas.
28 Dios Taytalláy,
rimallasaqmi
allin arreglallasqayki kaqkunamanta.
Dios Taytalláy,
tukuy punchawmi
ñoqa rimapayasqayki alabanzata.