Diospa waqaychakuyninmanta
Davidpa takisqan. David loco tukuptinmi Rey Abimelec payta wischururqa.
34
Tukuy tiempom ñoqallayqa
Tayta Diosta alabasaq.
Paytam ñoqallayqa
mana upallaspay yupaychasaq.
2 Diospim alabakullasaq.
Humildepas uyarichun.
Humildepas kusikuchun.
Diospim alabakullasaq.
3 Tayta Diosta ñoqallaywan allinneqta alabasun.
Tayta Diospa sutillanta huk sonqolla hatunchasun.
4 Tayta Diosta maskaptiymi uyariwan ñoqallayta.
Payqa libraykullawanmi
tukuy manchakusqaymanta.
5 Tayta Diosta qawaqkunam
sumaqtaraq kancharinku.
Tayta Diosta qawaqkunam
manapuni pukayanchu.
6 Ñakarispay Tayta Diosta
qayaptiymi uyariwan.
Lliw sasachakuyniymantam
payqariki libraykuwan.
7 Tayta Diospa angelninmi harkan
Dioslla respetaqta.
Tayta Diospa angelninmi salvan
Dioslla respetaqta.
8 Pruebaspataq yachaykuychik
Diospa allin kasqantapas.
Mayna-mayna kusisqamya
Diospi amparakullaqpas.
9 Tayta Diosta respetaychik
sapaqchallasqankunaqa.
Manam ima pisinqachu
respetaqninkunataqa.
10 Leonkunata yarqaptinmi
mana imallapas kanchu.
Tayta Diosta maskaqtaqa
manam ima pisinqachu.
11 Churillaykuna,
asuykamuspa
uyarillawaychik ñoqata.
Tayta Diostapas respetanatam
yachachisqaykichik ñoqaqa.
12 Unay watata kawsay munaqqa,
kusikuyta munaq runaqa
13 mana allinta ama rimaychu.
Engañota ama rimaychu.
14 Mana allinta saqerispayki
allinllatapuni ruraykuy.
Hawka kawsayta maskallaspayki
chaynatapuniña kawsakuy.
15 Tayta Diosqa cuidaykuchkanmi
allin ruraq runata.
Tayta Diosqa uyarintaqmi
mañakusqankunata.
16 Tayta Diosqa castiganpunim
mana allin ruraqta.
Tayta Diosqa chinkachinpunim
paykunapa sutinta.
17 Allin runa qayakuptinmi
Tayta Diosqa uyarin.
Lliw imapi ñakariptinmi
Tayta Diosqa lluptichin.
18 Huchanmanta llakiq runapa hichpallanpim sayaykun.
Huchayoqpas wanakuptinqa Tayta Diosmi salvaykun.
19 Allin runapa sasachakuyninmi achka-achkallaña.
Diosmi ichaqa libraykullanqapas llapachallantaña.
20 Tullunkunatam Tayta Dios
waqaychan llapachallantapas.
Chaykunamantam mana pakinqachu
huk tullullantapas.
21 Huchallikuqtam paypa rurasqallan lliw wañurachinqa.
Allin runata pipas cheqniqninqa huchayoqmi kanqa.
22 Diosmi libraykun serviqllankunapa vidallankutaqa.
Paypi llapallan confiakuqkunaqa inocentem kanqa.