Tayta Diosta alabanapaq taki
33
Allin runakuna,
Tayta Diosman takillaychik kusikuyllawanña.
Diospa munasqanman hina kawsaqkunapapas
alaballasqankum kachkan suma-sumaqllaña.
2 Tayta Diosmanyá graciasta qoychik
arpata sumaqta tocaspa.
Alabaspayá takiychik chunka cuerdayoq
arpata tocaspa.
3 Payllamanña mosoq takitapas takillaychik.
Qaparispa suma-sumaqtaraq tocaykuychik.
4 Tayta Diospa rimasqanqa mana pantayniyoqmi.
Tukuy ima rurasqanqa mana engañoyoqmi.
5 Payqa kuyanmi
tukuy munasqanman hina kaqkunataqa.
Payqa kuyanmi
allin arregloman hina kaqkunataqa.
Kuyakuyninqa
llimpariykullanmi tukuy kay pachataqa.
6 Tayta Diospa rimarisqanwanmi
cielokunaqa sumaqllaña unanchasqa karqa.
Tayta Diospa samaynillanwanmi
cielokunapi kaqkunapas unanchasqa karqa.
7 Payqariki montonachkaq hinam
lamar qochapi huñunarun yakukunatapas.
Payqariki qocharachiq hinam
waqaychaykurun uku-uku yakukunatapas.
8 Kay pachapi llapallan yachaqkuna,
qamkunaqa Tayta Diostayá respetaychik.
Kay pachapi llapallan kawsaqkuna,
qamkunaqa Tayta Diostayá manchakuychik.
9 Pay niptinmi imapas rikurirqa.
Kikinpuni kamachiptinmi takyaykurqa.
10 Tayta Diosqa yanqacharunmi
nacionkunapa rimanakusqantaqa.
Tayta Diosqa yanqacharunmi
runakunapa tanteanakusqantaqa.
11 Tayta Diospa rimarillasqankunaqa
takyan wiña-wiñaypaqñam.
Tayta Diospa tanteaykullasqankunaqa
takyan mana tukuypaqñam.
12 Tayta Diosta yupaychaq nacionkunaqa
mayna-mayna kusisqamya.
Tayta Diospa akllasqan runakunaqa
mayna-mayna kusisqamya.
13 Tayta Diosqa hanaq pachamantaraqmi qawamuchkan.
Payqariki llapan runakunatamya rikumuchkan.
14 Payqariki maymi yachallasqanmantam qawamuchkan.
Kay pachapi llapan yachallaqkunatam qawamuchkan.
15 Tanteaytaqa paymi qoykullarqa llapan runamanpas.
Qawachkanmi paykunapa ima rurasqankutapas.
16 Reyqariki manam salvakunqa
tropasapallaña kasqanraykuchu.
Soldadoqa manam librakunqa
kallpasapallaña kasqanraykuchu.
17 Mana pasaypaq valeqñam caballopas
rikurirun salvakuyta munasqaqa.
Mana valeqñam kallpayoq caballopas
rikurirun librakuyta munasqaqa.
18 Tayta Diosmi waqaychaykun
payllataña respetaqnin runataqa.
Paymi waqaychaykun
kuyapayakuynillanpi suyaqkunataqa.
19 Paykunaqariki suyachkanku
wañuymanta libraykunanpaqmi.
Paykunaqariki suyachkanku
yarqaypipas kawsachinanpaqmi.
20 Ñoqanchikqa Tayta Diospim
tukuy sonqowanraq confiakullachkanchik.
Payllapunim ñoqallanchiktaqa
kuyakuywan yanapawachkanchik.
Payllapunim ñoqallanchiktaqa
atiyninwan harkaykuwachkanchik.
21 Hinaptinqa payllaraykum
tukuy sonqonchikwan kusikullasunchik.
Paypa chuyay-chuyay sutillanpim
ñoqanchikqa confiakullachkanchik.
22 Dios Taytalláy,
qampi suyasqaykuman hinayá
kuyapayariykuwayku.