Pampachasqa kaspa kusikuymanta
Yachachinapaq taki, Davidpa Diosman takisqan
32
¡Mayna kusisqam mana kasukusqanmanta
Diospa pampachaykusqan runaqa!
¡Mayna kusisqam tukuy huchallankunapas
Diospa pakaykullasqan runaqa!
2 ¡Mayna kusisqam mana huchallikuqpaqña
Tayta Diospa hapisqan runaqa!
¡Mayna kusisqam tukuy piensasqankunapi
mana engañakullaq runaqa!
3 Huchallayta mana willakuptiyqa
cuerpollaymi aswan debilyarun.
Tukuy punchawllaña waqasqayraykum
cuerpollayqa aswan debilyarun.
4 Tuta punchawraqmi nisyullataña
qamqariki castigawarqanki.
Rupay tiempopipas hinaraqmiki
kallpaytapas chakirachirqanki.
(Samariy)
5 Mana pakaspam huchallaytaqa
qamllamanpuni willakurqayki.
Kikillaytaqmi yuyaymanaspa
nikullarqani kaynatapuni:
“Tayta Diosmanmi willakullasaq
mana kasukuq kasqaymantaqa.”
Qanmi pampachaykullawarqanki
tukuy culpayoq kasqaymantaqa.
(Samariy)
6 Chayraykum qampi iñillaqkunapas
tarikunayki tiempopi qamta mañakunqaku.
Cheqaptam lloqlla hatarimuqñapas
paykunamanqa manapuniña chayallanqachu.
7 Imamantapas pakaykuwaqniyqa
qamllamiki kanki.
Ñakariymanta waqaychawaqniyqa
qamllamiki kanki.
Librawaspaykim takiqkunawanraq
kusiykachiwanki.
(Samariy)
8 Tayta Diosmi nin:
Ñoqam entiendechisqayki qamtaqariki.
Ñoqam yachachillasqayki kawsakuytaqa.
Ñoqam qawariykullaspay consejasqayki.
9 Amayá caballo hina mana entiendeqqa kaychu.
Amayá mulapas hina mana entiendeqqa kaychu.
Chayna animalkunaqa kallpananmantam
freno riendaskunawanraq sujetapana.
Mana chayqa manamriki asukuykunchu.
10 Achkallaña nanaykunam kanqa
mana allin ruraqkunapaqqa.
Tayta Diosmiriki kuyapayan
paypi confiakullaqkunataqa.
11 Allin runakuna,
Tayta Diosraykuyá qamkunaqa kusikuychik.
Tayta Diosmantayá llumpaysuta kusikuychik.
Allin sonqokuna,
llapallaykichikyá kusikuywan takillaychik.