Tayta Diosllapi David confiakusqanmanta
Takiqkunapa maestronpaq, Davidpa Diosman takisqan
31
Dios Taytalláy,
Haykapipas qamllapimá amparakullani ñoqaqa.
Haykapipas amañayá hukmanyallasaqchu ñoqaqa.
Allin ruraq kaspaykiyá ñoqallayta lluptiykachiway.
2 Uyariykuwaspaykiyá apurawman libraykullaway.
Hatun rumi hinaraqyá qamqariki amparaykuway.
Pakaq wasi hinaraqyá qamllapuni pakaykullaway.
3 Qamllam kanki ñoqallayta qaqa hina
harkaykuwaqniyqa.
Qamllam kanki pakakuna wasi hina
pakaykuwaqniyqa.
Prometekullasqaykiman hinam pusakuwachkanki qamqa.
4 Pakapuwasqanku toqllamantayá qamqa amparaykuway.
Amparakunapas wasi hinayá qamqa amparaykuway.
5 Dios Taytalláy,
qamllamanmi ñoqallayqa espirituytapas qomullayki.
Cheqap Diosnilláy,
qamllamiki ñoqataqa sumaqtaraq librallawarqanki.
6 Cheqnillanim taytachakunapas
waqaychaykuq runakunataqa.
Tayta Diosllapiñamriki
confiakuykullachkanipas ñoqallayqa.
7 Ñoqataqa llumpayta
kuyapayawasqaykiraykum kusikusaq.
Qamllamiki ñoqapa ñakarillasqaykunataqa
qawarqanki.
Qamllamiki ñoqapa sasachakuyniykunataqa
yacharqanki.
8 Ñoqallaypa enemigoymanqa
manam entregaykuwarqankichu.
Ñoqataqa churaykuwarqanki
manam kichkillaña lugarpichu.
9 Dios Taytalláy,
llakipayariykullaway.
Ñoqallayqa kaypim ñakarillachkani.
Llumpayta waqasqayraykum
ñawillaypasriki wichirullachkanña.
Cuerpoywan imaykunapas
pasaypaqmiriki tukurullachkanña.
10 Nanaypa intusqallanmi ñoqallayqa
vidaytapas pasachkani.
Llakipa hapisqallanmi ñoqallayqa
watan-watan pasachkani.
Llumpayta ñakariptiymi ñoqallaypa
kallpallaypas tukuchkanña.
Llumpayta ñakariptiymi ñoqallaypa
kallpallaypas pisirunña.
11 Ñoqaqa kani enemigoykunapa
aswan despreciasqanraqmi.
Ñoqaqa kani vecinoykunapapas
llumpay despreciasqanraqmi.
Ñoqaqa kani reqsiwaqniykunapa
sinchi mancharikunanmi.
Callepi ñoqa rikuwaqniykunapas
ayqerikuruwanraqmi.
12 Wañusqatapas hinañam
qonqarullawanku ñoqataqa.
Chamchasqa puyñu hinañam
kaypi kallachkani ñoqallayqa.
13 Uyarikunim achkallay-achka
runa kamiwasqantaqa.
Chayraykum llumpay manchakuy
muyuriykullawan ñoqataqa.
Contraypimiki huk runa hinallaña
rimanakurunku.
Ñoqallaytaqa wañuchinankupaqmi
tanteanakurunku.
14 Dios Taytalláy,
ñoqam ichaqa qamllapipuni confiakuchkani.
“Qamllam Diosniyqa kapullawanki” nispam nichkani.
15 Imam pasawananpas makillaykipim kallachkan.
Tukuy enemigoykunamantayá libraykullaway.
Qatikachawaqniykunamantayá libraykullaway.
16 Serviqnikitaqa kuyakuywanyá qawariykuway.
Kuyapayakuynillaykiraykuyá salvaykullaway.
17 Dios Taytalláy,
qayakamullachkaptiyqa amayá
kachaykullawaychu penqaymanqa.
Tukuy mana allin ruraqkunayá
ñakarillachunku penqaypiqa.
Wañuqkunapa kallasqanmanyá
upallanankupaq wischuykuyqa.
18 Siminkupas upallaruchunñayá
llullallata rimaqkunapaqa.
Paykunaqa mana allinllatamá
rimachkanku kawsakuqmantapas.
Paykunaqa despreciakusparaqmá
hatun tukusparaq rimankupas.
19 ¡Mayna-mayna hatunraqmi
tukuy rurasqallaykikunaqa!
Chaykunatam waqaychallarqanki
respetaqnikikunapaq.
Chaykunatam rurarqanki qamllapiña
confiakuqkunapaq.
Lliw runapa ñawpaqninpimriki
rurallarqankipas qamqa.
20 Confiakullaqnikikunataqa
qayllaykipim pakaykunki.
Enemigollaypa rimanakusqankumantam pakaykunki.
Wasillayki ukupiraqmiki qamqa waqaychaykullanki.
21 ¡Alabasqayá kachun Tayta Diosqa!
Admirakuypaq kaqkunata ruraykuspam
ñoqallaytaqa kuyapayariwarqa.
Tropakunapa chawpichasqan murallasqa
llaqtapiraqmi kuyapayariwarqa.
22 Qonqaymantaraq mancharikullaspaymiki
piensarurqani pakakurusqaykita.
Ichaqa qanmi uyariykullawarqanki
ruegakullaspay qayakamullasqayta.
23 Tayta Diostayá kuyaychik
llapallan iñiqnillankunaqa.
Tayta Diosllamá waqaychan
payllapi confiakuqkunataqa.
Achkanpitaqmá paganqa
paytukuq lliw runakunamanqa.
24 Tayta Diospi confianzawan suyaqkunaqa
allinneqtaraqyá kallpanchakuychik,
sonqoykichiktayá takyachillaychik.