Tayta Diosman graciasta David qosqanmanta
Templo dedicananpaq Davidpa Diosman takisqan
30
Dios Taytalláy,
sasachakuymanta horqoykuwasqaykiraykum
qamtaqa hatunchallayki.
Enemigoykuna kusipayawananmantam
ñoqata harkawarqanki.
2 Dios Taytalláy,
qayakullaptiymi qamqa hampiykuwarqanki.
Diosniymi qamqa kallanki.
3 Wañuy patanpiña kallachkaptiymiki
qamqa ñoqata librawarqanki.
Wañuqkunapapas kallasqanman rinaymantam
kawsariykachiwarqanki.
4 Tayta Diosman iñiq runakunayá
payman takillaychik.
Chuya kayninmanta yuyarispayá
agradecekuychik.
5 Payqariki ratochallapaqmi piñakurunpas.
Payqa kawsananchikkamam favorecewasunpas.
Achikyaytam kusikusun tutan waqallaspapas.
6 “Manam haykapipas urmasaqchu” nispaymi
ñoqallayqa hawka kaspay piensallarani.
7 Dios Taytalláy,
Ñoqallaytamriki favorecewaspayki
allinneqta takyaykachillawarqanki.
Llumpa-llumpaysutam ñoqallayqariki
hukmanyallarqani pakakuruptiki.
8 Dios Taytáy,
qamllatam qayakamusqayki.
Señorlláy,
qamllatam ruegakamusqayki.
9 ¿Yaqachum ima allinpas kanman
pasaypaqtaña ñoqallay wañukullaptiyqa?
¿Yaqachum ima allinpas kanman
wañuqkunapa kasqanman urmaykullaptiyqa?
10 Dios Taytáy,
uyariykuspayá
llakipayariykullaway.
Dios Taytáy,
ñoqataqa qamyá
aswan yanapaykullaway.
11 Qamqa ñoqapa llakikuynillaytam
llumpa-llumpay kusikuymanña tikraykapuwanki.
Luto pachata chustuykuwaspaykim
kusikuna pachallaywanña hinaykachiwanki.
12 Yupaychasqay Dios Taytalláy,
chayraykumá ñoqaqa qamllataña alaballasqayki.
Chayraykumá ñoqaqa qamllamanña takipullasqayki.
Wiñaypaqmá ñoqaqa qamllataña reqsikullasqayki.