Tayta Diospa allin reqsisqa kasqanmantayá

willakuychik.

Tayta Diospa atiyniyoqraq kasqanmantayá

willakuychik.

2 Tayta Diospa allin reqsisqa sutinmantayá willakuychik.

Tayta Diospaq sumaqllataña pachakuspayá adoraychik.

3 Tayta Diosmi lamar qocha hawanpipas qaparichkan.

Sumaqllaña kancharichkaq Diosmi tunrururuykuchkan.

Hatun lamar qocha hawankunapiraqmiki kachkan.

4 Tayta Diospa voznillanqa nisyu-nisyullañam kachkan.

Paypa voznillanqa mayna atiyniyoqllañam kachkan.

5 Taytanchik Diospa voznillanqa

cedro sachakunapas pakipaqmi.

Libano Montekunapiña

cedro sachakunapas pakipaqmi.

6 Payqa Libano Montepi sachakunataqa

uña torota hinañam pawaykachachirqa.

7 Tayta Diosqa vozninwanmi

pukurimun llipipipiq llipyaykunata.

8 Tayta Diosqa vozninwanmi

katkatataykachin purun chunniqkunata.

Payqariki katkatatachinmi

Cades lawkunapi lliw chunniqtapas.

9 Tayta Diospa vozninqa qewiparunmi

encina sachakunatapas.

Tayta Diospa vozninqa rawmaparunmi

montepi sachakunatapas.

Templollanpim paytaqa llapachallanku

sumaqta yupaychallankupas.

10 Tayta Diosqariki munaychakullanmi

sinchi parapa hawanpipas.

Rey hinaraqmiki tiyaykullaspanraq

payqa gobiernaykullachkanpas.

11 Tayta Diosqa runakunatapas

allin kallpanchaywanmi yanapaykun.

Tayta Diosqa runankunatapas

hawka kawsakuywanmi bendeciykun.