Mañakusqanchikta Tayta Dios uyarisqanmanta
Davidpa takisqan
28
Dios Taytalláy,
qamllatam
ñoqallayqa qayakamullayki.
Amparaqlláy,
qamllatam
ñoqallayqa qayakamullayki.
Qampuniyá amaña
upallaspa contestaykullaway.
Mana qamllapuni
contestaykullawasqaykiraykumriki
wañuq runamanpas
rikchakuqraq ñoqallayqa kallachkani.
2 Qamtaq uyariykullaway
qaparispa ruegakullasqayta.
Qamtaq uyariykullaway
makillaykunata hoqariptiy,
sapaqchallasqayki temploykiman
makillayta hoqariptiy.
3 Amapuni aysaykullawaychu ñoqataqa
mana allin ruraqkunatawan kuskataqa
nitaq huchallikuqkunatawan kuskatapas.
Paykunaqa hawka kawsaymanta rimaspapas
runamasin dañaruypim yuyaymanachkanku.
4 Paykunamanqa rurasqanman hinayá
merecesqankuta pagaykapuy allinneqta.
Paykunamanqa pagaykuy qampuniyá
mana allinkunatapas rurasqankumanta.
Paykunamanqa merecesqankutayá
qoykapullay makinkupa rurayninkumanta.
5 Paykunaqa manapunim entienderinkuchu
Tayta Diospa tukuy ima rurasqanmantaqa
nitaq paypa tukuy unanchallasqanmantaqa.
Chaymi Tayta Diosqa paykunata tuñichinqa.
Manapunim huktawanqa hatarichinqachu.
6 Ruegakusqay uyarillawaqniy Tayta Diosqa
kachun suma-sumaqllaña alabaykullasqa.
7 Tayta Diosmi atiyninwan harkaykuwaqniyqa.
Paypipunim confiakullarqani ñoqallayqa.
Chaymi payqa ñoqallayta yanapaykuwarqa.
Chaymi kusikuywan llimparichkan sonqollaypas.
Takillasqaywanmi agradecekuchkanipas.
8 Tayta Diosllam runankuna kallpanchaykuqninqa.
Payllapunim aceitewan sapaqchaykullasqa
reyta amparaykullaspa salvaykuqnillanqa.
9 Dios Taytalláy,
runaykikunatayá qamllapuni salvaykuy.
Qampa kaqkunatayá bendeciykuy allinta.
Runaykikunatayá michiykullay allinta.
Marqarichkaq hinayá wiñaypaqña waqaychay.