Tayta Diosmi kanchaykuwaqniyqa hinaspa salvaqniyqa
Davidpa takisqan
27
Tayta Diosmi kanchaykuwaqniyqa,
manam pitapas manchakunichu.
Tayta Diosmi salvaykuwaqniyqa,
manam pitapas manchakunichu.
Tayta Diosmi amparaqnillayqa,
manam pitapas manchakunichu.
2 Mana allin ruraqkunam
mikuypaq-mikuruwananpaq pawaykuruwanku.
Contrallaypi lliw kaqkunam
enemigollaykunapiwan pawaykuwanku.
Ichaqa pawaykuwachkaspankupas
haytakuruspankum kuchpakurullanku.
3 Tropa muyuykuwaptinpas
sonqoyqa manapunimriki manchakullanqachu.
Guerra hatarimuptinpas
ñoqaqa manapunimriki hukmanyallasaqchu.
4 Ñoqallaypam kapullawachkan imam mañakusqay.
Chaytam ñoqallayqa maskallachkani.
Tayta Diospa templollanpiña wañukunaykama
kawsakuytañam munallachkani.
Tayta Diospa lliw sumaqllaña kaynin qawaykuytam
ñoqaqariki munallachkani.
Tayta Diospa templollanpiña yuyaymanaykuytam
ñoqaqariki munallachkani.
5 Ñakarina punchawkunaña chayaykamuptinpas
yachakunanpim pakaykuwanqa.
Tayta Diosqa karpan ukupim tapaykullawanqa.
Rumimanraqmi hoqariwanqa.
6 Enemigoykuna muyuykuwaptinmi
ñoqallayqariki masyariykullasaq.
Chaymi Diosnillayta adoraykunaypaq
karpallanpa ñawpaqninpi animalta
kusikuyllawanña wañuchipullasaq.
Ñoqallayqariki Tayta Diosllapaqña
takillaspayraqmi alabaykullasaq.
7 Dios Taytalláy,
qayakullasqaytayá uyariykullaway.
Llakipayawaspayá contestaykullaway.
8 Dios Taytalláy,
qamqa sonqollaytamá rimapayarqanki:
“Yanapaykunaypaqyá maskawaychik” nispa.
Qamllatapunitaqmá maskaykullachkayki.
9 Qamqa amapuniyá pakakullawaychu.
Rabiawanqa amayá wischurullawaychu.
Yanapaykuwaqniymá qamqa kapuwanki.
Sapaytaqa amayá saqerullawaychu.
Salvaqnillay Diosniymá qamqa kapuwanki
10 Dios Taytalláy,
ñoqataqa mamayña saqeruwaptinpas,
ñoqataqa taytayña saqeruwaptinpas,
ñoqataqa qamllañam uywakullawanki.
11 Dios Taytalláy,
wateqaqniyraykuyá yachaykachillaway.
Alli-allintañayá kawsaykachillaway.
Ñannillaykipiñayá qamqa pusallaway.
12 Ñoqataqa amayá qamqa entregaykuwaychu.
Enemigollaymanyá ama qoykuwaychu.
Llulla rimaqkunamá contrallaypi kachkan.
Dañaruwananpaqmá contrallaypi kachkan.
13 Kay pachapiraq kawsakunaykamaqa
qawasaqmi Tayta Diospa allin rurallasqankunataqa.
Chaykunatapas qawaykunaymantaqa
manapunimriki iskayrayallachkanichu ñoqallayqa.
14 Tayta Diosllapiñayá qamqa hapipakuy.
Kallpanchakuykuspayá allinneqta sayay.
Tayta Diosllapiñayá qamqa hapipakuy.