Mana faltayoq kawsakuymanta
Davidpa takisqan
26
Dios Taytalláy,
qamllapuniyá allin arreglota ruraykullaway.
Allinllatamá ñoqallayqariki kawsakurqani.
Qamllapiñamá mana hukmanyaspa confiakurqani.
2 Dios Taytalláy,
qamllapuniyá qawapaykuwaspa pruebaykullaway.
Sonqollaytayá piensallasqaytawan qawaykullaway.
3 Siemprepunimá kuyawasqaykita yuyallachkani.
4 Llulla rimaq runakunawanqa
manam kawsakullarqanichu.
Iskay uya runakunawanqa
manam kuskanchakurqanichu.
5 Cheqnirqanim mana allin kaqpa
tukuy huñunakuynintaqa.
Manamiki kawsallarqanichu
mana allin rurallaqwanqa.
6 Dios Taytalláy,
makillaypas aywisqaña kallaptinqa,
huchallaypas chuyanchasqa kallaptinqa
altarllaykitapas muyu-muyurispam
qamllataña alabasaq ñoqallayqa.
7 Qamllamanña agradecekullaspaymi
qampaq takipullasqayki ñoqallayqa.
Llapallan milagroykikunamantam
pimanñapas willakusaq ñoqallayqa.
8 Dios Taytalláy,
ñoqallayqa kuyallanim
yachanayki templollaykitaqa.
Ñoqallayqa kuyallanim
kancharichkaq yachanaykitaqa.
9 Amayá chinkarachiwaychu
huchasapa runakunatawan kuskataqa.
Amayá wañurachiwaychu
runakuna wañuykachiqtawan kuskataqa.
10 Paykunaqariki mana allinllatataqmi
tanteankupas.
Paykunaqariki yanqakunawanmi
rantirachikunpas.
11 Ñoqamá ichaqariki kawsakuchkani mana faltayoq.
Qamllayá ñoqallaytaqa libraykullaway imamantapas.
Qamllayá ñoqallaytaqa llakipayaway imapiñapas.
12 Manapunim mitkanqachu chakillayqa.
Allinsutam sayachkani ñoqallayqa.
Lliw huñunakuqkunapa chawpinpiqa
Tayta Diostamiki alaballasaq ñoqallayqa.