Diospa consejon Davidpa mañakusqanmanta
Davidpa takisqan
25
Dios Taytalláy,
ñoqallayqariki qamllatam mañakullayki.
2 Diosnilláy,
ñoqallayqariki qamllapim hapipakuni.
Amayá pasaypaq penqaymanqa kachaykullawaychu.
Amayá enemigoykunaqa asikuwachunchu.
3 Manamá qamllaman confiakuqqa penqaypichu kanqa.
Chaynamá traicionakuqkunaqa llumpay penqaypiraq kanqa.
4 Dios Taytalláy,
reqsiykachillawayá
munasqallaykiman hina kawsakuytapas.
Yachaykachillawayá
munasqallaykiman hina kawsakuytapas.
5 Yachaykachillawayá
cheqap kaqnikiman hina pusawaspayki.
Salvaykuqniy Diosniymá
qamqariki ñoqallaypaq kapullawanki.
Hina qampunitaqmá
tukuy punchaw confiakunay Diosqa kallanki.
6 Dios Taytalláy,
amayá qonqaruychu
ñawpaq tiempokunapi hina
llakipayakuynikimantaqa.
Dios Taytalláy,
amayá qonqaruychu
ñawpaq tiempokunapi hina
kuyapayakuynikimantaqa.
7 Dios Taytalláy,
amayá yuyariychu mozollaraq kallaspay
tukuy huchallikuy-kullasqaymantaqa.
Dios Taytalláy,
amayá yuyariychu mana kasukullaspay
tukuy mana allin rurasqaymantaqa.
Kuyapayakuynikiman hinayá
ñoqallaytaqa yuyariykullaway.
Allin kallasqaykimanpas hinayá
ñoqallaytaqa uyariykullaway.
8 Tayta Diosqariki mayna alli-allin Diosmi.
Tayta Diosqariki manapuni pantaruqmi.
Chayraykum payqa huchayoqkunata
yachaykachinqa allin kawsakuyta.
9 Humildekunatam pusan leynillanman hina.
Payllataqmi kawsachinpas munasqanman hina.
10 Kuyakuywanmi Tayta Diosqa ruran.
Cheqap kayninman hinam lliwta ruran.
Chaynataqa ruran
tukuy contratonkuna kasukuqkunawanmi.
Chaynataqa ruran
kamachikuyninkuna kasukuqkunawanmi.
11 Dios Taytalláy,
sutillaykiraykum mana allin
rurasqaykunamanta pampachaykuwanki.
Huchallaykunatam nana-nanaq
maychikaña kaptinpas pampachaykuwanki.
12 Tayta Diosllamiki yachachinqa
allintaña kawsayta respetaqnintaqa.
13 Tukuy imayoqmi payqariki
suma-sumaqllataña kawsakullanqapas.
Chayna runapaqa mirayninpas
chaskiykullanqataqmi herenciallantaqa.
14 Tayta Diosqariki sumaqllaña amigopas
hinamya respetaqninpaqqa.
Contratollantapas payqariki
yachaypaqmi-yachachin lliw paykunamanqa.
15 Ñoqallayqariki Tayta Diostam
tuta punchawkunapas qawaykachallani.
Payqa ñoqallayta toqlla hina
peligrokunamanta libraykuwaqniymi.
16 Dios Taytalláy,
qawariykuwaspayá llakipayariykullaway.
Ñoqaqariki sapallaymi kaypi ñakarillachkani.
17 Ñakarisqaymantayá qampuniña libraykuway.
Pensamientopa intusqanmi ñoqallayqa kallachkani.
18 Ñakarillasqaytayá llamkallasqaytawan qaway.
Huchallaykuna pampachawanaykipaqmi mañakuyki.
19 Qamqa qawariykuyá enemigollaykunata.
Llumpayllatañam paykunaqariki mirariykuchkanpas.
Ñoqallaytaqa cheqnikuywanraqmi qawallawankupas.
20 Ñoqallaytaqa qamyá libraykuspa waqaychaway.
Qamllapipuni confiakuspam mana penqakusaqñachu.
21 Qamqa munasqaykiman hina
kawsaptiymi cuidawanki.
Mana pantasqayraykumiki
qamqa waqaychallawanki.
Qamllapimiki ñoqallayqa
aswan confiakullachkani.
22 Diosnilláy,
Israelpa lliw castankunatayá
libraykuy tukuy ñakariyninmanta.