Kancharichkaq reymanta
Davidpa Diosman takisqan
24
Tayta Diospam tukuy
kay pachaqa,
paypataqmi kay pachapi tukuy ima kallaqpas.
Tayta Diospam tukuy kay allpaqa,
paypataqmi kay allpapi llapachallan yachaqpas.
2 Tayta Diosmi tukuy kay pachapa
cimientonta churaykurqa lamar qocha hawanpi.
Tayta Diosmi tukuy kay pachapa
cimientonta takyachirqa mayukuna hawanpi.
3 ¿Pitaq seqanman
Tayta Diospa yachakunan moqomanqa?
¿Pitaq sayanman
Tayta Diospa sapaqchasqan sitiopiqa?
4 Chaymanqa yaykunqa
ima ruraywanpas mana huchallikuqllam.
Chaymanqa yaykunqa
ima piensaywanpas mana huchallikuqllam.
Chaymanqa chayanqa
taytachakunapas mana adoraykuqllam.
Chaymanqa chayanqa
yanqakunamanta mana juraq runallam.
5 Chayna runaqa
Tayta Diospa sumaq bendeciykusqanmi.
Salvaq Diosninpa
mana huchallikuqpaqña chaskisqanmi.
6 Chaynam kanqaku
Tayta Diosman hamukullaq lliw runaqa.
Chaynam kanqaku
uyallayki qawaykuyta maskallaqqa.
Chaynam kanqaku
Jacobpapas Diosnillanta maskallaqqa.
(Samariy)
7 Kichakuychikyá zaguanpa lliw punkunkuna.
Kichakuychikyá wiñaypaq kaq punkukuna.
Kancharichkaq reymá chayninta yaykumullanqa.
8 ¿Pitaq wak sumaqllaña kancharichkaq reyqa?
Payqariki mana manchakuq kallpasapa Tayta Diosmi.
Payqariki soldado hina kallpasapa Tayta Diosmi.
9 Kichakuychikyá zaguanpa lliw punkunkuna.
Kichakuychikyá wiñaypaq kaq punkukuna.
Kanchariq reymá chayninta yaykumullanqa.
10 ¿Pitaq wak sumaqllaña kancharichkaq reyqa?
Payqariki llapan runapas kamaykachiq Tayta Diosmi.
Payqariki sumaqllataña kancharichkaq Tayta Diosmi.
(Samariy)