Diospa yanapakuynin Davidpa mañakusqanmanta
Takiqkunapa maestronpaq, raku vozpi Diosman takinapaq Davidpa rurasqan taki
12
Dios Taytalláy
¡qampuniñayá salvaykullawayku ñoqaykutaqa!
Tukurunñamá qamllamanña iñiq runakunaqa.
Chinkarunñamá llapa confiakuna runakunaqa.
2 Llullallatamá rimankupas llapa runakunaqa.
Engañowanmá alabakunkupas runakunaqa.
3 Dios Taytalláy,
puchukachiyá chayna iskay uya kaqkunataqa.
Puchukachiyá yanqa alabakuq kaqkunataqa.
4 “Vencerusunchikqa rimarikuspam.
Siminchikqariki kikillanchikpam.
¿Yanqaraqchum pipas kamachiwachwan?”
niqkunatayá qamqa pasaypaqta puchukarachiy.
5 Tayta Diosmi nin kaynata:
“Ñakariqkuna sarupasqa kasqanraykum
ñoqapuni hatarisaq.
Lliw wakchakuna waqachisqa kasqanraykum
kunanpuni hatarisaq.
Mañakuwasqan salvaciontam paykunaman
kunanpuni qoykullasaq.”
6 Tayta Diospa promesanqa
allpa hornopi chulluchisqa
chuyay-chuyay qollqe hina cheqappunim.
Tayta Diospa promesanqa
qanchiskamapas chulluchisqa
chuyay-chuyay qollqe hina cheqappunim.
7 Dios Taytalláy,
ñoqaykutamá qamqa allintaraq cuidawankiku.
Wiñaypaqñamá chayna runamanta cuidawankiku.
8 Muyurichkanmá mana allin ruraq runakunaqa.
Hatunchankumá mana allintapas runakunaqa.